വയനാട് സിപിഎമ്മിൽ വിഭാഗീയത രൂക്ഷമായതിന് പിന്നാലെ മുതിർന്ന നേതാവും പൂതാടി ഗ്രാമപഞ്ചായത്ത് അംഗവുമായ എ.വി. ജയൻ പാർട്ടി വിട്ടു. ജില്ലാ സമ്മേളനം മുതൽ പാർട്ടിക്കുള്ളിലെ ഒരു വിഭാഗം തന്നെ ബോധപൂർവം വേട്ടയാടുകയാണെന്നും ഇനി സിപിഎമ്മിൽ തുടർന്നുപോകാൻ കഴിയില്ലെന്നും അദ്ദേഹം വ്യക്തമാക്കി. 35 വർഷത്തെ പാർട്ടി പ്രവർത്തനത്തിന് ശേഷമാണ് ജയൻ കടുത്ത നിലപാടിലേക്ക് നീങ്ങിയത്.

സംസ്ഥാന കമ്മിറ്റി അംഗം സി.കെ. ശശീന്ദ്രൻ, ജില്ലാ സെക്രട്ടറി കെ. റഫീഖ് എന്നിവർക്കെതിരെ താൻ ഉന്നയിച്ച വിമർശനങ്ങളാണ് തനിക്കെതിരെ ആയുധമാക്കിയതെന്ന് ജയൻ ആരോപിച്ചു. തന്നെ അപമാനിക്കാനായി ചില നേതാക്കൾ കോൺഗ്രസ് ഗ്രൂപ്പുകൾക്ക് വിവരങ്ങൾ ചോർത്തി നൽകിയതായും അദ്ദേഹം പറഞ്ഞു. ആരെയും വെല്ലുവിളിക്കാനില്ലെന്നും എന്നാൽ തന്നെ അവഗണിക്കുന്ന ഒരിടത്ത് നിൽക്കാൻ താൽപ്പര്യമില്ലെന്നുമാണ് അദ്ദേഹത്തിന്റെ നിലപാട്.

കഴിഞ്ഞ കുറച്ചു കാലമായി സംഘടനയ്ക്കുള്ളിൽ നേരിടുന്ന അവഗണന ഇനിയും സഹിക്കാനാവില്ലെന്നും ജയൻ കൂട്ടിച്ചേർത്തു. ജില്ലയിലെ പ്രധാനപ്പെട്ട നേതാക്കളിൽ ഒരാൾ പാർട്ടി വിട്ടത് വയനാട് സിപിഎമ്മിന് രാഷ്ട്രീയമായി വലിയ ക്ഷീണമാണ് ഉണ്ടാക്കിയിരിക്കുന്നത്. പാർട്ടിയുടെ സംഘടനാ സംവിധാനങ്ങളിൽ നിന്ന് പൂർണ്ണമായും മാറി നിൽക്കുന്നതായും അദ്ദേഹം മാധ്യമങ്ങളോട് പ്രതികരിച്ചു.