കൃഷിചെയ്യുന്ന വിദ്യാർഥികൾക്ക് ഗ്രേസ് മാർക്ക് നൽകുമെന്നും ഈ പദ്ധതി നടപ്പാക്കുന്ന രാജ്യത്തെ ആദ്യ സംസ്ഥാനമായി കേരളം മാറുമെന്നും കൃഷിവകുപ്പ് മന്ത്രി ടി. സിദ്ദിഖ് പ്രഖ്യാപിച്ചു. ഈ അധ്യയന വർഷം 500 സ്‌കൂളുകളിൽ 'കതിർ' കാർഷിക ക്ലബ്ബിന്റെ പ്രവർത്തനം ആരംഭിച്ചതായും വരും വർഷത്തിൽ സംസ്ഥാനത്തെ എല്ലാ സ്‌കൂളുകളിലേക്കും ഇത് വ്യാപിപ്പിക്കുമെന്നും മന്ത്രി പറഞ്ഞു. തിരുവനന്തപുരത്തെ കുളത്തൂർ ഗ്രാമപ്പഞ്ചായത്തിൽ നടന്ന നെല്ലിക്കോണം ഏലയിലെ കൊയ്ത്തുത്സവം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

സ്‌കൂളുകൾക്ക് പുറമെ വിദ്യാർഥികളുടെ വീടുകളിലും കൃഷി പ്രോത്സാഹിപ്പിക്കുന്ന രീതിയിലാണ് പദ്ധതി ആസൂത്രണം ചെയ്തിരിക്കുന്നത്. പദ്ധതിയുടെ നടത്തിപ്പിനായി ഓരോ സ്‌കൂളിനും 10,000 രൂപ വീതം നൽകും. ഇതിനോടനുബന്ധിച്ച് 'കതിർ സഞ്ചാരം', 'കതിർ മാർക്കറ്റ്' എന്നിവ സംഘടിപ്പിക്കുമെന്നും കാർഷിക വിളകളെ സ്‌കൂളുകളിലെ ഉച്ചഭക്ഷണ പദ്ധതിയുമായി ബന്ധിപ്പിക്കുമെന്നും മന്ത്രി വ്യക്തമാക്കി.