നടി ആക്രമിക്കപ്പെട്ട കേസിലെ വിചാരണ കോടതി ജഡ്ജിയായിരുന്ന ഹണി എം. വർഗീസിനെ ഹൈക്കോടതി ജഡ്ജിയായി ഉയർത്തുന്നതിനെതിരെ അതിജീവിത രംഗത്ത്. ഹണി എം. വർഗീസിന് സ്ഥാനക്കയറ്റം നൽകരുതെന്ന് ആവശ്യപ്പെട്ട് അതിജീവിതയും പിന്തുണയ്ക്കുന്നവരും രാഷ്ട്രപതിക്കും സുപ്രീം കോടതി ചീഫ് ജസ്റ്റിസിനും നിവേദനം നൽകി. ഹൈക്കോടതി കൊളീജിയം നൽകിയ ശുപാർശയിന്മേലുള്ള നടപടികൾ സുപ്രീം കോടതിയിൽ പുരോഗമിക്കുന്നതിനിടെയാണ് ഈ നിർണ്ണായക ഇടപെടൽ.

ആക്രമണ ദൃശ്യങ്ങൾ അടങ്ങിയ മെമ്മറി കാർഡ് കോടതിയുടെ കസ്റ്റഡിയിലിരിക്കെ അനധികൃതമായി പരിശോധിക്കപ്പെട്ട സംഭവത്തിൽ ജഡ്ജി ഉൾപ്പെടെയുള്ളവർക്ക് പങ്കുണ്ടെന്ന ഗൗരവകരമായ ആരോപണമാണ് നിവേദനത്തിൽ ഉന്നയിച്ചിരിക്കുന്നത്. നീതിപൂർവ്വമായ വിചാരണ നടത്തുന്നതിൽ വിചാരണ കോടതി ജഡ്ജിയുടെ ഭാഗത്തുനിന്ന് വീഴ്ചയുണ്ടായെന്ന് അതിജീവിത നേരത്തെയും ചൂണ്ടിക്കാട്ടിയിരുന്നു. ഈ സാഹചര്യത്തിൽ സ്ഥാനക്കയറ്റം നൽകുന്നത് നീതിനിർവ്വഹണത്തെ ബാധിക്കുമെന്നാണ് ഇവരുടെ നിലപാട്.

മെമ്മറി കാർഡിന്റെ ഹാഷ് വാല്യൂ മാറിയ സംഭവത്തിൽ ഹൈക്കോടതിയുടെ മേൽനോട്ടത്തിൽ അന്വേഷണം നടന്നിരുന്നുവെങ്കിലും അതിൽ ജഡ്ജിയെ സംരക്ഷിക്കുന്ന നിലപാടാണ് ഉണ്ടായതെന്ന് വിമർശനമുയർന്നിരുന്നു. അതിജീവിതയ്‌ക്കൊപ്പം സാമൂഹിക-സാംസ്‌കാരിക രംഗത്തെ പ്രമുഖരും നിവേദനത്തിൽ ഒപ്പുവെച്ചിട്ടുണ്ട്. സുപ്രീം കോടതി കൊളീജിയം ഈ പരാതി പരിഗണിക്കുമോ എന്നത് വരും ദിവസങ്ങളിൽ വ്യക്തമാകും.