തിരുവനന്തപുരം നാലാഞ്ചിറയിൽ വീട്ടമ്മയെ ഭർത്താവ് മക്കളുടെ മുന്നിൽ വെച്ച് കഴുത്തറുത്ത് കൊലപ്പെടുത്തി. നാലാഞ്ചിറ സ്വദേശിനി ഹസീന ബീവി (36) ആണ് ദാരുണമായി കൊല്ലപ്പെട്ടത്. കൊലപാതകത്തിന് ശേഷം ഒളിവിൽ പോയ ഭർത്താവ് സുരേഷിനായി (46) മണ്ണന്തല പോലീസ് അന്വേഷണം ഊർജ്ജിതമാക്കിയിട്ടുണ്ട്.

കുടുംബവഴക്കിനെ തുടർന്ന് ഇരുവരും തമ്മിലുണ്ടായ രൂക്ഷമായ വാക്കേറ്റമാണ് ഒടുവിൽ അതിക്രൂരമായ കൊലപാതകത്തിൽ കലാശിച്ചത്. തങ്ങളുടെ മക്കളുടെ മുന്നിൽ വെച്ചായിരുന്നു സുരേഷ് കൃത്യം നടത്തിയത്. അടുക്കളയിൽ ഉപയോഗിക്കുന്ന കറിക്കത്തി ഉപയോഗിച്ചാണ് ഇയാൾ ഹസീനയുടെ കഴുത്തറുത്തത്. മാതാപിതാക്കൾ തമ്മിൽ വഴക്കുണ്ടാകുന്നതും അമ്മയെ പിതാവ് ക്രൂരമായി ആക്രമിക്കുന്നതും കണ്ട മൂത്ത മകളാണ് വിവരം ഉടൻ തന്നെ മണ്ണന്തല പോലീസ് സ്റ്റേഷനിൽ അറിയിച്ചത്. എന്നാൽ പോലീസ് എത്തുന്നതിന് മുൻപ് തന്നെ ഹസീന മരണപ്പെട്ടിരുന്നു.

കൊലപാതകം നടത്തിയ ശേഷം സുരേഷ് സ്വന്തം കാറിൽ കയറി സംഭവസ്ഥലത്തുനിന്ന് അതിവേഗം രക്ഷപ്പെടുകയായിരുന്നു. നാലാഞ്ചിറയിലെ ഒരു വാടകവീട്ടിൽ കഴിഞ്ഞ നാലുമാസമായി താമസിച്ചു വരികയായിരുന്നു ഹസീനയും കുടുംബവും. ഇവർക്ക് നാല് മക്കളുണ്ട്. ഹസീനയും സുരേഷും തമ്മിൽ നേരത്തെയും കടുത്ത കുടുംബപ്രശ്നങ്ങളും അസ്വാരസ്യങ്ങളും നിലനിന്നിരുന്നതായാണ് അയൽവാസികളിൽ നിന്നും പോലീസിനും ലഭിക്കുന്ന വിവരം.

തുടർച്ചയായുണ്ടാകുന്ന കുടുംബവഴക്കുമായി ബന്ധപ്പെട്ട് കൊല്ലപ്പെട്ട ഹസീന ഇന്നലെയും (ചൊവ്വാഴ്ച) മണ്ണന്തല പോലീസ് സ്റ്റേഷനിൽ നേരിട്ടെത്തി ഭർത്താവിനെതിരെ പരാതി നൽകിയിരുന്നു. തുടർന്ന് പോലീസ് നിർദേശപ്രകാരം വീട്ടിലേക്ക് മടങ്ങിയതിന് പിന്നാലെയാണ് രാത്രിയിൽ സുരേഷ് വീണ്ടും വഴക്കുണ്ടാക്കുകയും ക്രൂരമായ കൊലപാതകം നടത്തുകയും ചെയ്തത്. ഒളിവിൽ പോയ പ്രതിക്കായി ജില്ലാ അതിർത്തികളിലടക്കം പോലീസ് കർശന നിരീക്ഷണം ഏർപ്പെടുത്തിയിട്ടുണ്ട്.