നിയമസഭയിൽ താൻ സന്നിഹിതനായിരിക്കുമ്പോൾ വന്ദേമാതരം പൂർണ്ണരൂപത്തിൽ ആലപിക്കാതിരുന്നതിൽ കടുത്ത അതൃപ്തി പരസ്യമാക്കി ഗവർണർ രാജേന്ദ്ര ആർലേക്കർ. ഗവർണറുടെ ഔദ്യോഗിക സാന്നിധ്യത്തിൽ വന്ദേമാതരം ആലപിക്കുമ്പോൾ അത് പൂർണ്ണരൂപത്തിൽ തന്നെ വേണമെന്നത് ഔദ്യോഗിക പ്രോട്ടോക്കോളിന്റെ ഭാഗമാണെന്ന് അദ്ദേഹം വ്യക്തമാക്കി. നിയമസഭയിൽ വന്ദേമാതരം ആലപിക്കുകയല്ല, മറിച്ച് കേവലം സംഗീതം (വാദ്യം) മാത്രമാണ് പ്ലേ ചെയ്തതെന്നും എന്നാൽ അത് പൂർണ്ണരൂപത്തിലായിരുന്നില്ലെന്നും അദ്ദേഹം ചൂണ്ടിക്കാട്ടി.

ഈ വിഷയത്തിലുള്ള തന്റെ ശക്തമായ വിയോജിപ്പും പ്രതിഷേധവും ഗവർണർ സ്പീക്കറെ നേരിട്ട് അറിയിച്ചിട്ടുണ്ട്. നിയമസഭയിലെ ചടങ്ങുകളിൽ വന്ദേമാതരം പൂർണ്ണരൂപത്തിലായിരിക്കണം പ്ലേ ചെയ്യേണ്ടതെന്ന് രാജ്ഭവൻ ഉദ്യോഗസ്ഥർ മുൻകൂട്ടി ആവശ്യപ്പെട്ടിരുന്നുവെന്നും അദ്ദേഹം വെളിപ്പെടുത്തി. എന്നാൽ എന്ത് കാരണത്താലാണ് നിയമസഭാ അധികൃതർ ഇതിന് വിരുദ്ധമായ നിലപാട് സ്വീകരിച്ചതെന്ന് വ്യക്തമല്ലെന്നും വരും ദിവസങ്ങളിൽ സഭ ഇക്കാര്യത്തിൽ ആവശ്യമായ തിരുത്തലുകൾ വരുത്തുമെന്ന് പ്രതീക്ഷിക്കുന്നതായും അദ്ദേഹം കൂട്ടിച്ചേർത്തു.

സംഭവം അതീവ ഗൗരവകരമാണെന്നും ഭാവിയിൽ ഇത്തരം വീഴ്ചകൾ ആവർത്തിക്കരുതെന്നും ഗവർണർ ആവശ്യപ്പെട്ടു. ഔദ്യോഗിക പ്രോട്ടോക്കോൾ കൃത്യമായി പാലിക്കപ്പെടുന്നുണ്ടെന്ന് ഉറപ്പാക്കേണ്ടത് അത്യാവശ്യമാണെന്നും സ്പീക്കറുമായി സംസാരിച്ചതിൽ നിന്ന് വരും ദിവസങ്ങളിൽ അനുകൂലമായ മാറ്റങ്ങൾ ഉണ്ടാകുമെന്ന് കരുതുന്നതായും അദ്ദേഹം മാധ്യമങ്ങളോട് പറഞ്ഞു. സതീശൻ സർക്കാരിന്റെ ആദ്യ നയപ്രഖ്യാപന പ്രസംഗത്തിനിടെയുണ്ടായ വന്ദേമാതര തർക്കം ഇതോടെ പുതിയ രാഷ്ട്രീയ ചർച്ചകൾക്ക് വഴിതുറന്നിരിക്കുകയാണ്.