എസ്.എഫ്.ഐ പ്രവർത്തകരുടെ പ്രതിഷേധത്തിൽ സർവകലാശാലാ ഓഫീസ് പ്രവർത്തനം തടസപ്പെട്ടതും സർവകലാശാലയിലെ വസ്തുവകകൾക്കും ഉപകരണങ്ങൾക്കും വലിയ തോതിൽ നാശനഷ്ടങ്ങൾ സംഭവിച്ചതുമായി ബന്ധപ്പെട്ട്, താൽക്കാലിക വൈസ് ചാൻസലർ ഡോ. സിസ തോമസ് ഡിജിപിക്ക് പരാതി നൽകി.സെനറ്റ് ഹാളിലേക്ക് അതിക്രമിച്ചു കയറിയ പ്രവർത്തകർ വസ്തുവകകൾ തകർത്തുവെന്ന് പരാതിയിൽ പറയുന്നു. സംഭവത്തിൽ കൃത്യമായ അന്വേഷണം നടത്തി കുറ്റക്കാർക്കെതിരെ നടപടിയെടുക്കണമെന്നുമാണ് വിസിയുടെ ആവശ്യം.

സർവകലാശാലകളെ കാവിവൽക്കരിക്കാൻ ശ്രമം നടക്കുന്നുവെന്ന് ചൂണ്ടിക്കാട്ടി എസ്എഫ്‌ഐ കേരള സർവകലാശാലയിലേക്ക് മാർച്ച് നടത്തിയത്. കേരള സർവകലാശാല ആസ്ഥാനത്തെ കവാടം തള്ളിത്തുറന്ന പ്രവർത്തകർ സെനറ്റ് ഹാളിനുള്ളിലേക്ക് കടന്ന് പ്രതിഷേധിച്ചു. പിന്നീട് പൊലീസ് പ്രവർത്തകരെ അറസ്റ്റ് ചെയ്ത് നീക്കുകയാണ് ഉണ്ടായത്. വിദ്യാർഥികൾക്ക് പിന്തുണയുമായി സിപിഐഎം സംസ്ഥാന സെക്രട്ടറി എം വി ഗോവിന്ദൻ എത്തിയിരുന്നു