കർണാടകയിലെ കുടക് ജില്ലയിൽ ട്രെക്കിങ്ങിന് പോയ മലയാളി യുവതിയെ കാണാതായി. കണ്ണൂർ സ്വദേശിനിയും ഐടി പ്രൊഫഷണലുമായ ശരണ്യയെയാണ് (36) കാണാതായത്. ഏപ്രിൽ രണ്ട് മുതൽ ശരണ്യയെക്കുറിച്ച് വിവരമൊന്നുമില്ലെന്ന് പോലീസ് അറിയിച്ചു. വനംവകുപ്പ് ഉദ്യോഗസ്ഥരും നാട്ടുകാരും പോലീസും ചേർന്ന് രണ്ട് ദിവസമായി പ്രദേശത്ത് വ്യാപകമായ തിരച്ചിൽ നടത്തുകയാണ്.

കൊച്ചിയിൽ നിന്ന് കുടകിലേക്ക് ഒറ്റയ്ക്ക് യാത്ര തിരിച്ച ശരണ്യ, യാവകപടി ഗ്രാമത്തിലെ ഒരു ഹോംസ്റ്റേയിലാണ് താമസിച്ചിരുന്നത്. വനംവകുപ്പ് ചെക്ക്പോസ്റ്റിൽ ഐഡി കാർഡും മറ്റ് വിവരങ്ങളും നൽകിയ ശേഷമാണ് ഇവർ ട്രെക്കിങ്ങിനായി കാട്ടിലേക്ക് പ്രവേശിച്ചത്. ശരണ്യ ട്രെക്കിംഗ് റൂട്ടിലേക്ക് പോകുന്നത് സിസിടിവി ദൃശ്യങ്ങളിൽ വ്യക്തമാണെങ്കിലും തിരികെ വരുന്ന ദൃശ്യങ്ങൾ ലഭിച്ചിട്ടില്ല.

കാണാതാകുന്നതിന് തൊട്ടുമുമ്പ് ശരണ്യ ഫോണിൽ സംസാരിച്ചതായി മുതിർന്ന പോലീസ് ഉദ്യോഗസ്ഥൻ സ്ഥിരീകരിച്ചു. എന്നാൽ ഫോൺ ഇപ്പോൾ സ്വിച്ച് ഓഫ് ആയ നിലയിലാണ്. വനമേഖലയിൽ ഡ്രോണുകളും മണത്തുപിടിക്കാൻ പരിശീലനം ലഭിച്ച നായ്ക്കളെയും ഉപയോഗിച്ച് തിരച്ചിൽ ഊർജ്ജിതമാക്കിയിട്ടുണ്ട്.