കേന്ദ്രസർക്കാർ പാസാക്കിയ ഖനന നിയന്ത്രണ ഭേദഗതി ബിൽ രാജ്യത്തിന്റെ ഫെഡറൽ തത്ത്വങ്ങളെയും സംസ്ഥാനങ്ങളുടെ ഭരണഘടനാപരമായ അവകാശങ്ങളെയും ലംഘിക്കുന്നതാണെന്ന് പ്രതിപക്ഷ നേതാവ് പിണറായി വിജയൻ. സംസ്ഥാനങ്ങളുടെ പരിധിയിൽ വരുന്ന ധാതുവിഭവങ്ങളിലും ഭൂമിയിലും അധിക നികുതിയോ സെസ്സോ ഈടാക്കാനുള്ള അവകാശത്തിലേക്കുള്ള കടന്നുകയറ്റമാണ് നിയമഭേദഗതിയെന്നും അദ്ദേഹം ആരോപിച്ചു.

സംസ്ഥാന താത്പര്യങ്ങൾക്കെതിരും ഭരണഘടനയുടെ അടിസ്ഥാന തത്ത്വങ്ങൾക്ക് നിരക്കാത്തതുമായ ഈ ഭേദഗതി വ്യവസ്ഥകൾക്കെതിരേ സുപ്രീംകോടതിയെ സമീപിക്കാൻ യു.ഡി.എഫ്. സർക്കാർ തയ്യാറാകണമെന്നും പിണറായി വിജയൻ ആവശ്യപ്പെട്ടു.

അപൂർവ ധാതുക്കളുടെ ഖനനം സ്വകാര്യ മേഖലയ്ക്ക് തുറന്നുകൊടുക്കുന്നതിലൂടെ രാജ്യത്തിന്റെ ധാതുസമ്പത്ത് കോർപ്പറേറ്റുകൾക്ക് കൈമാറാനാണ് കേന്ദ്രസർക്കാർ ശ്രമിക്കുന്നതെന്നും അദ്ദേഹം ആരോപിച്ചു. ഇത്തരം സ്വകാര്യവത്കരണ നയങ്ങൾക്ക് കേരളത്തിലെ യു.ഡി.എഫ്. സർക്കാർ പിന്തുണ നൽകുകയാണെന്നും പിണറായി വിജയൻ പറഞ്ഞു.

കരിമണൽ ഖനനം സ്വകാര്യവത്കരിക്കാനുള്ള ബജറ്റ് നിർദേശങ്ങളും 'റെയർ എർത്ത് ഇടനാഴി' പദ്ധതിയും ഇതിന് തെളിവാണെന്നും അദ്ദേഹം ഫെയ്സ്ബുക്ക് കുറിപ്പിൽ ആരോപിച്ചു.