നടൻ നിവിൻ പോളിക്കെതിരെ പരാതി നൽകിയ നിർമ്മാതാവ് പി.എസ്. ഷംനാസിനെതിരെ അന്വേഷണം നടത്താൻ കോടതി ഉത്തരവിട്ടു. വൈക്കം ഫസ്റ്റ് ക്ലാസ് ജുഡീഷ്യൽ മജിസ്ട്രേട്ട് കോടതിയാണ് ഷംനാസിനെതിരെ അന്വേഷണം പ്രഖ്യാപിച്ചത്. കോടതിയിൽ വ്യാജ സത്യവാങ്മൂലം നൽകിയതിനും, കോടതിയെ തെറ്റിദ്ധരിപ്പിക്കുന്ന രേഖകൾ ഹാജരാക്കിയതിനും എതിരായാണ് ഈ നടപടി. ഭാരതീയ ന്യായ സംഹിതയിലെ 227-ാം വകുപ്പ് പ്രകാരമാണ് കോടതി അന്വേഷണത്തിന് ഉത്തരവിട്ടിരിക്കുന്നത്.

'ആക്ഷൻ ഹീറോ ബിജു-2' എന്ന ചിത്രവുമായി ബന്ധപ്പെട്ട് 2023-ൽ നിവിൻ പോളി, സംവിധായകൻ എബ്രിഡ് ഷൈൻ, തലയോലപ്പറമ്പ് സ്വദേശി ഷംനാസ് എന്നിവർ ഒരു കരാറിൽ ഒപ്പിട്ടിരുന്നു. ഈ കരാർ പ്രകാരം സിനിമയുടെ എല്ലാ അവകാശങ്ങളും നിവിൻ പോളിയുടെ നിർമ്മാണ കമ്പനിയായ പോളി ജൂനിയറിനായിരുന്നു. എന്നാൽ, ഈ വിവരം മറച്ചുവെച്ച്, ഷംനാസ് ഫിലിം ചേംബറിൽ നിന്ന് ചിത്രത്തിന്റെ പേരിന്റെ അവകാശം സ്വന്തമാക്കി. ഇതിനായി നിവിൻ പോളിയുടെ വ്യാജ ഒപ്പ് ചേർത്ത രേഖയും ഇയാൾ ഹാജരാക്കിയിരുന്നു.

ഫിലിം ചേംബറിൽ നിന്ന് ലഭിച്ച ഈ രേഖ ഹാജരാക്കി, സിനിമയുടെ പൂർണ്ണ അവകാശം തനിക്കാണെന്ന് വൈക്കം കോടതിയിൽ നൽകിയ സത്യവാങ്മൂലത്തിൽ ഷംനാസ് അവകാശപ്പെട്ടു. ഈ വാദത്തിന്റെ അടിസ്ഥാനത്തിൽ നിവിൻ പോളിക്കെതിരെ എഫ്.ഐ.ആർ. ഇടാനുള്ള ഉത്തരവ് നേടുകയും ചെയ്തിരുന്നു. എന്നാൽ, കോടതിയെ തെറ്റിദ്ധരിപ്പിക്കുന്ന രേഖകളാണ് ഷംനാസ് ഹാജരാക്കിയതെന്ന് ബോധ്യപ്പെട്ടതിനെ തുടർന്നാണ് കോടതി ഇയാൾക്കെതിരെ അന്വേഷണം പ്രഖ്യാപിച്ചത്. നിവിൻ പോളിക്കെതിരെ എഫ്.ഐ.ആർ. ഇടാൻ ഉത്തരവിട്ട അതേ കോടതി തന്നെയാണ്, ആ വിധി കോടതിയെ തെറ്റിദ്ധരിപ്പിച്ച് നേടിയതാണെന്ന് പ്രാഥമിക തെളിവുകളുടെ അടിസ്ഥാനത്തിൽ കണ്ടെത്തി, ഷംനാസിനെതിരെ ജാമ്യമില്ലാ വകുപ്പിൽ പുതിയ അന്വേഷണം പ്രഖ്യാപിച്ചിരിക്കുന്നത്.