മൊബൈൽ ഫോണിന് റേഞ്ചില്ല; ടവറിന് മുകളിൽ കയറി ആത്മഹത്യാ ഭീഷണി മുഴക്കി യുവാവ്
മൊബൈല്‍ ഫോണില്‍ റേഞ്ച് ലഭിക്കാത്തതിൽ പ്രതിഷേധിച്ച് ടവറിനു മുകളില്‍ കയറി ആത്മഹത്യാ ഭീഷണി മുഴക്കി യുവാവ്. മൈലപ്പുഴ ആറ്റുപുറത്ത് ജെറിന്‍(29) ആണ് ടവറിന്റെ മുകളില്‍ നിന്ന് താഴേക്ക് ചാടുമെന്ന് ഭീഷണി മുഴക്കിയത്. ചെറുതോണിയിലെ 100 അടി ഉയരത്തിലുള്ള ബിഎസ്എന്‍എല്‍ ടവറിനു മുകളിലാണ് യുവാവ് കയറിയത്.
ദിവസങ്ങളായി പ്രദേശത്ത് ബിഎസ്എന്‍എല്‍ മൊബൈല്‍ ഫോണുകൾക്ക് കവറേജില്ലായിരുന്നു. ഇതോടെ പുറംലോകവുമായി ബന്ധപ്പെടാന്‍ കഴിയാതെ വന്നു. നാട്ടുകാർ വിവരം അറിയിച്ചതിനെ തുടർന്ന് കഞ്ഞിക്കുഴി പൊലീസ് സംഭവ സ്ഥലത്തെത്തി. അതിനിടയില്‍ മൊബൈല്‍ ഫോണില്‍ കവറേജ് വരികയും, യുവാവ് താഴെ ഇറങ്ങുകയുമായിരുന്നു.