രാജ്യം വിടാൻ ശ്രമിക്കുന്നതിനിടെ ഐഎസ്ഐഎസ് (ഇസ്‌ലാമിക് സ്റ്റേറ്റ് ഓഫ് ഇറാഖ് ആൻഡ് സിറിയ) തൃശൂർ മൊഡ്യൂൾ നേതാവിനെ ചെന്നൈയിൽ നിന്ന് അറസ്റ്റ് ചെയ്തുവെന്ന് ദേശീയ അന്വേഷണ ഏജൻസി(എൻഐഎ). ഒളിവിലായിരുന്ന സയീദ് നബീൽ അഹമ്മദ് എന്നയാളെയാണ് എൻഐഎയുടെ പ്രത്യേക സംഘം പിടികൂടിയത്. 

തമിഴ്നാട്ടിലും കർണാടകയിലുമായി പല സ്ഥലങ്ങളിൽ ഒളിവിൽ കഴിഞ്ഞിരുന്ന ഇയാൾ വ്യാജ രേഖ ചമച്ച് നേപ്പാളിലേക്കു കടക്കാനുള്ള ശ്രമത്തിലായിരുന്നു. കഴിഞ്ഞ കുറച്ചാഴ്ചകളായി സയീദിനെ പിടികൂടാനുള്ള എൻഐഎ ശ്രമിക്കുന്നുണ്ടായിരുന്നു. ഇയാളിൽനിന്ന് വ്യാജ രേഖകളും ഡിജിറ്റൽ ഉപകരണങ്ങളും പിടിച്ചെടുത്തു.

തൃശൂർ കേന്ദ്രമായി പ്രവർത്തിക്കുന്ന ഐഎസ്ഐഎസ് മൊഡ്യൂൾ കേരളത്തിൽ വിവിധ സ്ഥലങ്ങളിൽ ആക്രമണം നടത്താൻ പദ്ധതിയിടുന്നുവെന്ന് എൻഐഎയ്ക്ക‌ു വിവരം ലഭിച്ചതിനെത്തുടർന്ന് ജൂലൈ 11നാണ് കേസ് റജിസ്റ്റർ ചെയ്തത്. കൊള്ളയടി അടക്കമുള്ള നിയമവിരുദ്ധ പ്രവർത്തനങ്ങളിലൂടെ ഇവർ പണം കണ്ടെത്താനും ശ്രമിച്ചിരുന്നു. നിരവധി ഐഎസ് പ്രവർത്തകരെ ഇതിനകം അറസ്റ്റ് ചെയ്തതായി എൻഐഎ അറിയിച്ചു.