പ്ലസ് വൺ സപ്ലിമെന്ററി അലോട്‌മെന്റിനായുള്ള അപേക്ഷ സ്വീകരിച്ച ആദ്യ ദിനമായ ശനിയാഴ്ച്ച ലഭിച്ചത് 45,592 അപേക്ഷകൾ. മുഖ്യ അലോട്‌മെന്റിൽ സ്ഥാനം ലഭിക്കാതവരും, പുതുതായി അപേക്ഷിച്ചവരുമാണ് ഇതിൽ ഉൾപ്പെടുന്നത്.അപേക്ഷ സമർപ്പിക്കാനുള്ള അവസാന തീയതി തിങ്കളാഴ്ച വൈകിട്ട് 5 മണി വരെയാണ്. വ്യാഴാഴ്ച രാത്രി ആദ്യ സപ്ലിമെന്ററി അലോട്‌മെന്റ് ലിസ്റ്റ് പ്രസിദ്ധീകരിക്കും. വെള്ളി, ശനി ദിവസങ്ങളിൽ വിദ്യാർത്ഥികൾക്ക് സ്‌കൂളിൽ ചെന്ന് അഡ്മിഷൻ എടുക്കാം.

എല്ലാ ജില്ലകളിലുമായി 57,920 സീറ്റാണ് ഏകജാലകം വഴിയുള്ള പൊതുമെറിറ്റിൽ സപ്ലിമെന്ററി അലോട്മെന്റിനായുള്ളത്. ഇതിൽ 5,251 പേർ ഒന്നിലധികം ജില്ലകളിലേക്ക് അപേക്ഷിച്ചവരാണ്. ഫലത്തിൽ നാൽപ്പതിനായിരത്തോളം കുട്ടികൾ മാത്രമാണ് ശനിയാഴ്ച രാത്രിവരെ അപേക്ഷിച്ചത്.

സപ്ലിമെന്ററി അലോട്മെന്റ്‌റിനായി അപേക്ഷിച്ചവരിൽ 42,883 പേരും എസ്എസ്എൽസിക്കാരാണ്. സിബിഎസ്ഇയിൽ നിന്നുള്ളവരുടെ 1,428 അപേക്ഷകളും ഐസിഎസ്ഇ സിലബസിൽ നിന്നുള്ള 120 അപേക്ഷകളും ലഭിച്ചു. 1,161 പേർ ഇതരസംസ്ഥാനങ്ങളിൽ നിന്ന് പത്താംക്ലാസ് യോഗ്യതനേടിയവരാണ്.

മലപ്പുറം ജില്ലയിലാണ് ഏറ്റവുമധികം അപേക്ഷകളുള്ളത്. 11,233 എണ്ണം. 8,703 സീറ്റാണ് മലപ്പുറത്ത് മെറിറ്റിൽ അവശേഷിക്കുന്നത്. മറ്റു ജില്ലകളിൽ ലഭിച്ച അപേക്ഷകളുടെ എണ്ണവും ബ്രാക്കറ്റിൽ ഒഴിവുള്ള സീറ്റും. തിരുവനന്തപുരം 1,553 (4,321), കൊല്ലം 1,404 (4,485), പത്തനംതിട്ട 250 (3,234), ആലപ്പുഴ 1,234 (4,000), കോട്ടയം 1,205 (3,354), ഇടുക്കി 940 (2,062), എറണാകുളം 3,056 (5,137), തൃശ്ശൂർ 3,989 (4,896), പാലക്കാട് 7,197 (3,850), കോഴിക്കോട് 6,400 (5,352), വയനാട് 937 (1,550), കണ്ണൂർ 4,337 (4,486),കാസർകോട് 1,887 (2,490).