കേരള നിയമസഭാ തിരഞ്ഞെടുപ്പ് പ്രചാരണം ഉച്ചസ്ഥായിയിലെത്തിച്ച് പ്രധാനമന്ത്രി നരേന്ദ്ര മോദി വീണ്ടും സംസ്ഥാനത്തെത്തി. ചങ്ങനാശ്ശേരി എൻ.എസ്.എസ് കോളേജിൽ ഹെലികോപ്റ്ററിലിറങ്ങിയ അദ്ദേഹം, അവിടെനിന്ന് പത്ത് കിലോമീറ്ററോളം റോഡ് മാർഗം സഞ്ചരിച്ചാണ് തിരുവല്ലയിലെ പൊതുസമ്മേളന വേദിയിലെത്തിയത്. വഴിയിലുടനീളം ബിജെപി പ്രവർത്തകരും പൊതുജനങ്ങളും ചേർന്ന് ആവേശകരമായ സ്വീകരണമാണ് പ്രധാനമന്ത്രിക്ക് നൽകിയത്.

തിരുവല്ലയിലെ വേദിയിൽ കുമ്മനം രാജശേഖരൻ ഉൾപ്പെടെയുള്ള എൻഡിഎയുടെ പ്രമുഖ നേതാക്കൾ അദ്ദേഹത്തെ സ്വീകരിച്ചു. തിരഞ്ഞെടുപ്പ് പ്രഖ്യാപനത്തിന് ശേഷം ഇത് രണ്ടാം തവണയാണ് മോദി കേരളത്തിലെത്തുന്നത്. നേരത്തെ പാലക്കാട്ടും തൃശൂരും അദ്ദേഹം സന്ദർശിച്ചിരുന്നു. എഫ്.സി.ആർ.എ (FCRA) ബില്ലുമായി ബന്ധപ്പെട്ട വിവാദങ്ങൾ നിലനിൽക്കുന്ന സാഹചര്യത്തിൽ, പ്രമുഖ സഭാ ആസ്ഥാനങ്ങളുള്ള മധ്യകേരളത്തിൽ പ്രധാനമന്ത്രി നടത്തുന്ന ഈ സന്ദർശനം രാഷ്ട്രീയമായി ഏറെ പ്രാധാന്യമർഹിക്കുന്നു.

തിരുവല്ലയിലെ പൊതുസമ്മേളനത്തിന് ശേഷം പ്രധാനമന്ത്രി തിരുവനന്തപുരത്തേക്ക് തിരിക്കും. വൈകുന്നേരം അഞ്ച് മണിയോടെ തലസ്ഥാനത്തെത്തുന്ന അദ്ദേഹം കിള്ളിപ്പാലം മുതൽ കരമന വരെ നീളുന്ന വമ്പൻ റോഡ് ഷോയിൽ പങ്കെടുക്കും. തിരുവനന്തപുരം സെൻട്രൽ, നേമം മണ്ഡലങ്ങളിലൂടെയാണ് റോഡ് ഷോ കടന്നുപോകുന്നത്. വൈകുന്നേരം ഏഴ് മണിയോടെ അദ്ദേഹം തിരുവനന്തപുരത്ത് നിന്ന് മടങ്ങും. പ്രധാനമന്ത്രിയുടെ സന്ദർശനം പ്രമാണിച്ച് പത്തനംതിട്ട, തിരുവനന്തപുരം ജില്ലകളിൽ കനത്ത സുരക്ഷയാണ് ഏർപ്പെടുത്തിയിരിക്കുന്നത്.