തൃശൂർ ചാവക്കാട്ട് നാലുദിവസം പ്രായമായ കുഞ്ഞ് മരിച്ച സംഭവത്തിൽ മൃതദേഹം പുറത്തെടുത്ത് പോസ്റ്റുമോർട്ടം നടത്താൻ കോടതി ഉത്തരവിട്ടു. തൃശൂർ സബ് ഡിവിഷണൽ മജിസ്‌ട്രേറ്റാണ് അനുമതി നൽകിയത്.2021 ജനുവരി 10നാണ് ചാവക്കാട് സ്വദേശികളായ ഇബ്രാഹിം-മുഹ്‌സിന ദമ്പതികളുടെ നാലുദിവസം പ്രായമായ കുഞ്ഞ് മരിച്ചത്. തുടർന്ന് പോസ്റ്റുമോർട്ടം നടത്താതെ മൃതദേഹം മറവ് ചെയ്യുകയായിരുന്നു.

2026 മാർച്ച് 20ന് ഏഴാമത്തെ പ്രസവത്തിന് പിന്നാലെ മുഹ്‌സിനയും മരിച്ചിരുന്നു. മതിയായ ചികിത്സ ലഭിക്കാതെയാണ് മുഹ്‌സിന മരിച്ചതെന്നായിരുന്നു കുടുംബത്തിന്റെ പരാതി. ഈ കേസിൽ അന്വേഷണം പുരോഗമിക്കുന്നതിനിടെയാണ് കുഞ്ഞിന്റെ മരണത്തിലും സംശയം ഉയർന്നത്. തുടർന്ന് ചാവക്കാട് സബ് ഇൻസ്‌പെക്ടർ മൃതദേഹം പുറത്തെടുത്ത് പോസ്റ്റുമോർട്ടം നടത്താൻ കോടതിയിൽ അപേക്ഷ നൽകുകയായിരുന്നു. അപേക്ഷ പരിഗണിച്ചാണ് കോടതി അനുമതി നൽകിയത്.