മകരവിളക്ക് മഹോത്സവത്തിനായി നാളെ (ഡിസംബർ 30 ചൊവ്വാഴ്ച) വൈകിട്ട് 5ന് ശബരിമല ക്ഷേത്രം നട തുറക്കും. തന്ത്രി മഹേഷ് മോഹനരുടെ സാന്നിധ്യത്തിൽ മേൽശാന്തി ഇ ഡി പ്രസാദ് നടതുറക്കും. തുടർന്ന് ശ്രീലകത്ത് ദീപം തെളിക്കും.മേൽശാന്തി സന്നിധാനത്തെ ആഴിയിൽ അഗ്‌നി പകർന്ന ശേഷം തീർത്ഥാടകർക്ക് പതിനെട്ടാം പാടി ചവിട്ടി ദർശനം നടത്താം.

മാളികപ്പുറം ക്ഷേത്രനട, മേൽശാന്തി എം.ജി മനു നമ്പൂതിരി തുറക്കും. നാളെ പ്രത്യേക പൂജകളില്ല. 31ന് പുലർച്ചെ മൂന്നിന് നിർമ്മാല്യ ദർശനവും പതിവ് അഭിഷേകവും. തുടർന്ന് കിഴക്കേ മണ്ഡപത്തിൽ ഗണപതി ഹോമം. നെയ്യഭിഷേകം, അഷ്ടാഭിഷേകം, ഉഷ:പൂജ, കലശാഭിഷേകം, കളഭാഭിഷേകം, ഉച്ചപൂജ എന്നിവ പൂർത്തിയാക്കി ഉച്ചയ്ക്ക് ഒന്നിന് നടയടയ്ക്കും. വൈകിട്ട് 3ന് നട തുറക്കും. 6.30ന് ദീപാരാധനയ്ക്കു ശേഷം പുഷ്പാഭിഷേകം ആരംഭിക്കും. രാത്രി 11ന് നടയടയ്ക്കും.