മുതിർന്ന സി.പി.എം നേതാവും മുൻ സംസ്ഥാന സെക്രട്ടേറിയറ്റ് അംഗവുമായ ബേബി ജോൺ (74) അന്തരിച്ചു. അസുഖബാധിതനായി ദീർഘനാൾ ചികിത്സയിലായിരുന്നു. തൃശ്ശൂർ സി.പി.എം ജില്ലാ സെക്രട്ടറി, സി.ഐ.ടിയു ജില്ലാ സെക്രട്ടറി എന്നീ നിലകളിൽ പ്രവർത്തിച്ചിട്ടുള്ള അദ്ദേഹം 2011-ൽ മണലൂർ മണ്ഡലത്തിൽ നിന്ന് നിയമസഭയിലേക്ക് മത്സരിച്ചിട്ടുണ്ട്.

അടിയന്തരാവസ്ഥക്കാലത്ത് ജയിൽവാസമനുഭവിച്ച അദ്ദേഹം നിരവധി തൊഴിലാളി പ്രക്ഷോഭങ്ങൾക്ക് നേതൃത്വം നൽകി. 1971-ൽ സി.പി.എം അംഗമായ ബേബി ജോൺ ചാവക്കാട് ഏരിയ സെക്രട്ടറി, ജില്ലാ സെക്രട്ടേറിയറ്റ് അംഗം എന്നീ ചുമതലകൾ വഹിച്ച ശേഷമാണ് 2006-ൽ തൃശ്ശൂർ ജില്ലാ സെക്രട്ടറിയാകുന്നത്. ബീഡി, മത്സ്യത്തൊഴിലാളി, ചെത്തുതൊഴിലാളി, ചുമട്ടുതൊഴിലാളി യൂണിയനുകളുടെ സംസ്ഥാന-ജില്ലാ ഭാരവാഹിയായും സജീവമായി പ്രവർത്തിച്ചിട്ടുണ്ട്.

1971 മുതൽ തൈക്കാട് ബ്ലാങ്ങാട് പി.വി.എം.എൽ.പി സ്‌കൂളിൽ അധ്യാപകനായിരുന്ന അദ്ദേഹം 1991-ൽ സർവീസിൽ നിന്ന് സ്വയം വിരമിച്ചാണ് മുഴുവൻസമയ രാഷ്ട്രീയ പ്രവർത്തനത്തിലേക്ക് ഇറങ്ങിയത്. ചക്രമാക്കിൽ അന്തോണിയുടെയും മേരിയുടെയും മകനാണ്.