സി.പി.എം പാലക്കാട് മുൻ ജില്ലാ സെക്രട്ടറി ഇ. എൻ. സുരേഷ് ബാബുവിനെതിരായ ലൈംഗികാതിക്രമ പരാതിയിൽ പാർട്ടി തുടർനടപടികൾ ശക്തമാക്കി. സി.പി.എം കേന്ദ്ര കമ്മിറ്റിയുടെ ആഭ്യന്തര പരാതി പരിഹാര സമിതി (ഐ.സി.സി) വിഷയത്തിൽ അന്വേഷണം നടത്തിവരികയാണ്. പരാതിക്കാരിയായ വനിതാ നേതാവിന്റെ മൊഴിയെടുപ്പ് ഉൾപ്പെടെയുള്ള പ്രാഥമിക നടപടികൾ സമിതി പൂർത്തിയാക്കി.

ലൈംഗികാതിക്രമ പരാതിയിൽ ഇ. എൻ. സുരേഷ് ബാബുവിനെതിരെ സി.പി.എം അന്വേഷണം നടത്തുന്നു. നേരത്തെ സുരേഷ് ബാബുവിനെ ജില്ലാ സെക്രട്ടറി സ്ഥാനത്തുനിന്ന് മാറ്റിയതിന് പിന്നിൽ അഭിഭാഷക കൂടിയായ വനിതാ നേതാവ് നൽകിയ പരാതിയാണെന്ന് റിപ്പോർട്ടുകളുണ്ടായിരുന്നെങ്കിലും പാർട്ടി ഇക്കാര്യം ഔദ്യോഗികമായി സ്ഥിരീകരിച്ചിരുന്നില്ല. ഡിജിറ്റൽ തെളിവുകൾ സഹിതമാണ് പരാതിക്കാരി ഐ.സി.സിയെ സമീപിച്ചതെന്നാണ് വിവരങ്ങൾ.

അതേസമയം, പരാതിയുടെ വിശദാംശങ്ങൾ പാർട്ടി നേതൃത്വം ഇതുവരെ പരസ്യപ്പെടുത്തിയിട്ടില്ല. ആഭ്യന്തര പരാതി പരിഹാര സമിതി സമർപ്പിക്കുന്ന അന്വേഷണ റിപ്പോർട്ടും ശുപാർശകളും കേസിൽ സുരേഷ് ബാബുവിനെതിരെയുള്ള പാർട്ടിയുടെ തുടർനടപടികളിൽ നിർണായകമാകും.