വാഹനങ്ങളിൽ എയർഹോൺ ഉപയോഗം വർധിച്ചുവരുന്ന പശ്ചാത്തലത്തിൽ കടുത്ത നടപടിയുമായി ഗതാഗത മന്ത്രി കെ ബി ഗണേഷ് കുമാർ. വാഹനങ്ങളിലെ എയർഹോൺ പിടിച്ചെടുക്കുന്നതിനായി സ്‌പെഷ്യൽ ഡ്രൈവിന് മന്ത്രി നിർദേശം നൽകി. ഈ മാസം 13 മുതൽ 19 വരെയാണ് സ്‌പെഷ്യൽ ഡ്രൈവ് നടക്കുക.

പിടിച്ചെടുക്കുന്ന എയർഹോൺ മാധ്യമങ്ങളുടെ മുന്നിലെത്തിക്കണം. ഇവ പ്രദർശിപ്പിക്കണം. റോഡ് റോളർ ഉപയോഗിച്ച് എയർഹോണുകൾ നശിപ്പിക്കണമെന്നും ഉത്തരവിൽ പറയുന്നു. കഴിഞ്ഞദിവസം കോതമംഗലം കെഎസ്ആർടിസി ബസ് ടെർമിനൽ ഉദ്ഘാടനത്തിനിടെ സ്വകാര്യ ബസ് വേഗത്തിൽ ഹോണടിച്ചെത്തിയ സംഭവത്തിൽ മന്ത്രി നടപടിയെടുത്തിരുന്നു. ടെർമിനൽ ഉദ്ഘാടനത്തിനിടെ നിറയെ ആളുകളുമായി സ്വകാര്യ ബസ് എയർഹോൺ മുഴക്കിയെത്തുകയായിരുന്നു. ബസിന്റെ പെർമിറ്റ് റദ്ദാക്കാൻ ആർടിഒയ്ക്ക് മന്ത്രി നിർദ്ദേശം നൽകി. നിയമ ലംഘനങ്ങൾ അനുവദിക്കില്ലെന്നും മന്ത്രി വ്യക്തമാക്കിയിരുന്നു.

'ബഹുമാനപ്പെട്ട എംഎൽഎ പ്രസംഗിച്ചുകൊണ്ടിരിക്കുകയാണ്. ഫയർ എൻജിൻ വരുവാണെന്നാ അദ്ദേഹം വിചാരിച്ചത്. ഞാനും പേടിച്ചുപോയി. നിറയെ ആളെയും കൊണ്ട് റോക്കറ്റ് പോവുന്ന സ്പീഡിലാ പോയത്. ബസ് സ്റ്റാൻഡിനകത്ത് ഇത്രയും ഹോണടിക്കേണ്ട ആവശ്യമെന്താണ്' - പരിപാടിക്കിടെ മന്ത്രി ചോദിച്ചു.