സുകുമാര കുറുപ്പിന്റെ വണ്ടാനത്തുളള വീട് സർക്കാർ ഓഫീസാക്കുന്നു
![sukumara kurip](https://keralavoter.com/static/c1e/client/97483/uploaded/226ed566bfe440aad6cc4fdb5cd42aa0.jpg)
ചാക്കോ കൊലപാതകത്തിലെ പിടികിട്ടാപ്പുളളി സുകുമാര കുറുപ്പിന്റെ വണ്ടാനത്തുളള വീട് സർക്കാർ ഓഫീസാക്കുന്നു. റവന്യൂ ഉദ്യോഗസ്ഥർ സ്ഥലം സന്ദർശിച്ച് റിപ്പോർട്ട് തയ്യാറാക്കിയിട്ടുണ്ട്. റിപ്പോർട്ട് അടുത്ത ദിവസം തന്നെ സർക്കാരിന് സമർപ്പിച്ചേക്കും.
കാലങ്ങളായി ഒഴിഞ്ഞുകിടക്കുന്ന കെട്ടിടം വില്ലേജ് ഓഫീസിനായി വിട്ടുകൊടുക്കണമെന്ന് എച്ച് സലാം എംഎൽഎ റവന്യൂ വകുപ്പിനോട് ആവശ്യപ്പെട്ടിരുന്നു. വണ്ടാനം ടി ജി മെഡിക്കൽ കോളേജിന് കിഴക്ക് ഭാഗത്തായാണ് ഇരുനിലകളുളള ഈ കെട്ടിടം നിലനിൽക്കുന്നത്.
1800 ചതുരശ്ര അടി വിസ്തീർണമുളള കെട്ടിടവും സ്ഥലവും റവന്യൂ വകുപ്പിന്റെ ഉടമസ്ഥതയിലാണ്. കെട്ടിടം പഞ്ചായത്തിന് വിട്ടുകിട്ടണമെന്നാവശ്യപ്പെട്ട് 2017ൽ അമ്പലപ്പുഴ വടക്ക് പഞ്ചായത്ത് സർക്കാരിന് പ്രമേയം പാസാക്കി നൽകിയിരുന്നു.