സംസ്ഥാനത്ത് തുടരുന്ന കനത്ത ഉഷ്ണതരംഗത്തിന് ആശ്വാസമായി വേനൽമഴ എത്തുന്നു. ഈ മാസം 29 മുതൽ വിവിധ ജില്ലകളിൽ ശക്തമായ മഴയ്ക്ക് സാധ്യതയുള്ളതിനാൽ കേന്ദ്ര കാലാവസ്ഥാ വകുപ്പ് യെല്ലോ അലർട്ട് പ്രഖ്യാപിച്ചു. കഴിഞ്ഞ ദിവസങ്ങളിൽ ചിലയിടങ്ങളിൽ ഒറ്റപ്പെട്ട മഴ ലഭിച്ചിരുന്നെങ്കിലും വരും ദിവസങ്ങളിൽ മഴ കൂടുതൽ സജീവമാകുമെന്നാണ് പ്രവചനം.

മഴ മുന്നറിയിപ്പിന്റെ ഭാഗമായി ഏപ്രിൽ 29-ന് പത്തനംതിട്ട, ഇടുക്കി ജില്ലകളിലും, ഏപ്രിൽ 30-ന് കണ്ണൂർ, കാസർകോട് ജില്ലകളിലും യെല്ലോ അലർട്ട് പ്രഖ്യാപിച്ചിട്ടുണ്ട്. മേയ് ഒന്നിന് പത്തനംതിട്ട, ഇടുക്കി, വയനാട് ജില്ലകളിലും ജാഗ്രതാ നിർദ്ദേശമുണ്ട്. ഉഷ്ണതരംഗത്തിന് സമാനമായ സാഹചര്യം നിലനിൽക്കുന്ന കേരളത്തിൽ ഈ മഴ താപനില കുറയ്ക്കാൻ സഹായിക്കുമെന്നാണ് പ്രതീക്ഷിക്കുന്നത്.

അതേസമയം, മഴ എത്തുന്നതുവരെ സംസ്ഥാനത്ത് കടുത്ത ചൂട് തുടരും. ഇന്നും നാളെയും പാലക്കാട് ജില്ലയിൽ താപനില 40 ഡിഗ്രി സെൽഷ്യസ് വരെ ഉയർന്നേക്കാം. കൊല്ലത്ത് 39 ഡിഗ്രി സെൽഷ്യസും, പത്തനംതിട്ട, കോട്ടയം, തൃശൂർ, കോഴിക്കോട് ജില്ലകളിൽ 38 ഡിഗ്രി സെൽഷ്യസും വരെ ചൂട് കൂടും. ആലപ്പുഴ, എറണാകുളം, മലപ്പുറം, കണ്ണൂർ, കാസർകോട് ജില്ലകളിൽ 37 ഡിഗ്രി സെൽഷ്യസ് വരെയും തിരുവനന്തപുരത്ത് 36 ഡിഗ്രി സെൽഷ്യസ് വരെയും ചൂട് ഉയരാൻ സാധ്യതയുള്ളതിനാൽ സൂര്യതാപം ഏൽക്കാതിരിക്കാൻ ജാഗ്രത പാലിക്കണമെന്ന് കാലാവസ്ഥാ വകുപ്പ് അറിയിച്ചു.