തിരുവനന്തപുരം കട്ടേല മോഡൽ റെസിഡൻഷ്യൽ സ്‌കൂളിലെ കുട്ടികൾക്ക് പ്രവേശനോത്സവ ദിനത്തിൽ മിഠായി മേശയിലിട്ട് നൽകിയതുമായി ബന്ധപ്പെട്ടുണ്ടായ വിവാദത്തിൽ ഔദ്യോഗിക വിശദീകരണവുമായി കഴക്കൂട്ടം എം.എൽ.എയും ബി.ജെ.പി നേതാവുമായ വി. മുരളീധരൻ. തന്റെ ഔദ്യോഗിക ഫെയ്‌സ്ബുക്ക് കുറിപ്പിലൂടെയാണ് അദ്ദേഹം രാഷ്ട്രീയ വിവാദങ്ങൾക്ക് മറുപടി നൽകിയത്.

സ്‌കൂളിലെ കുരുന്നുകൾക്കായി താൻ സ്വന്തം നിലയിലാണ് മിഠായി വാങ്ങി പ്രവേശനോത്സവത്തിന് പോയതെന്ന് മുരളീധരൻ വ്യക്തമാക്കി. എന്നാൽ താൻ അവിടെ എത്തിയപ്പോഴേക്കും മന്ത്രി വരികയും പരിപാടി തുടങ്ങാറാകുകയും ചെയ്തിരുന്നു. വാങ്ങിക്കൊണ്ടുചെന്ന മിഠായി ഓരോ കുട്ടിക്കായി വ്യക്തിപരമായി വിതരണം ചെയ്യാൻ നിന്നാൽ മന്ത്രിയടക്കം ചടങ്ങിൽ പങ്കെടുന്ന മറ്റുള്ളവർ വീണ്ടും കാത്തുനിൽക്കേണ്ടി വരുമായിരുന്നു. കുട്ടികൾക്കായി കരുതൽപൂർവ്വം കൊണ്ടുപോയ മിഠായി അവർക്ക് നൽകണമെന്നതിനാലും, വിതരണം വേഗത്തിൽ പൂർത്തിയാക്കേണ്ടി വന്നതിനാലുമാണ് കുട്ടികൾ ഇരുന്ന മേശ തോറും ഒന്നിച്ച് നൽകിയതെന്ന് അദ്ദേഹം കുറിപ്പിൽ വിശദീകരിച്ചു.

സി.പി.എമ്മിനെതിരെ കടുത്ത വിമർശനം

വളരെ ലളിതമായ ഈയൊരു കാര്യത്തിനാണ് സി.പി.എം ജാതി വിദ്വേഷത്തിന്റെ നിറം കൊടുക്കാൻ ശ്രമിച്ചതെന്ന് വി. മുരളീധരൻ കുറ്റപ്പെടുത്തി. കമ്യൂണിസ്റ്റ് പാർട്ടി കുഞ്ഞുങ്ങളിൽ പോലും എത്രമാത്രം കൊടുംവിഷമാണ് കുത്തിനിറയ്ക്കാൻ ശ്രമിക്കുന്നതെന്ന് ഈ വിവാദത്തിലൂടെ വ്യക്തമാണെന്ന് അദ്ദേഹം ഫെയ്‌സ്ബുക്കിൽ കുറിച്ചു. വസ്തുതകൾ അന്വേഷിക്കാതെ ഒരു വിഭാഗം മാധ്യമങ്ങൾ ബി.ജെ.പി വിരോധം തലയ്ക്ക് പിടിച്ച് ഈ വിഷയം ഏറ്റെടുക്കുകയായിരുന്നു. ലോക്സഭാ തിരഞ്ഞെടുപ്പിൽ ജനങ്ങൾ ചൂലെടുത്ത് അടിച്ചിറക്കിയിട്ടും സി.പി.എമ്മിന്റെയും അവരുടെ അടിമകളുടെയും കണ്ണ് ഇതുവരെ തുറന്നിട്ടില്ലെന്നും അദ്ദേഹം പരിഹസിച്ചു.

നിയമസഭ തല്ലിത്തകർത്ത മുൻ വിദ്യാഭ്യാസമന്ത്രി വി. ശിവൻകുട്ടിയിൽ നിന്ന് തൽക്കാലം സംസ്‌ക്കാരം പഠിക്കേണ്ട ഗതികേട് തനിക്കില്ലെന്നും വി. മുരളീധരൻ തന്റെ ഫെയ്‌സ്ബുക്ക് പോസ്റ്റിന്റെ അവസാനം കുറിച്ച 'എൻ.ബി'യിലൂടെ (NB) ഓർമ്മിപ്പിച്ചു.

പ്രവേശനോത്സവത്തിനിടെ കുട്ടികൾക്ക് മേശപ്പുറത്തിട്ട് മിഠായി കൊടുത്ത മുരളീധരന്റെ നടപടി അങ്ങേയറ്റം തരംതാണതും വിവേചനപരവുമാണെന്ന് മുൻ വിദ്യാഭ്യാസമന്ത്രി വി. ശിവൻകുട്ടി ഉൾപ്പെടെയുള്ളവർ നേരത്തെ കടുത്ത ഭാഷയിൽ വിമർശിച്ചിരുന്നു. ഇതിന് പിന്നാലെയാണ് സോഷ്യൽ മീഡിയയിലൂടെ എം.എൽ.എയുടെ വിശദീകരണം പുറത്തുവന്നത്.