സംസ്ഥാനത്തെ മുതിർന്ന പൗരന്മാരുടെ ക്ഷേമവും സുരക്ഷിതത്വവും ഉറപ്പാക്കുന്നതിനായി വയോജനങ്ങൾക്ക് മാത്രമായി പ്രത്യേക സർക്കാർ വകുപ്പ് രൂപീകരിച്ച് ഔദ്യോഗിക ഉത്തരവിറങ്ങി. വയോജനങ്ങൾക്കായി പുതിയ ക്ഷേമ പദ്ധതികൾ ആവിഷ്കരിച്ച് നടപ്പിലാക്കുന്നതിനും, നിലവിൽ വിവിധ വകുപ്പുകൾക്ക് കീഴിലുള്ള പദ്ധതികൾ ഒരൊറ്റ കുടക്കീഴിൽ കൊണ്ടുവന്ന് കൂടുതൽ കാര്യക്ഷമമായി ഏകോപിപ്പിക്കുന്നതിനുമായാണ് പുതിയ വകുപ്പ് രൂപീകരിക്കുന്നതെന്ന് സർക്കാർ ഉത്തരവിൽ വ്യക്തമാക്കുന്നു.

കഴിഞ്ഞ ദിവസം നടത്തിയ വാർത്താ സമ്മേളനത്തിൽ മുഖ്യമന്ത്രി വി.ഡി. സതീശൻ വയോജനങ്ങൾക്കായി പ്രത്യേക വകുപ്പ് ഉടൻ നിലവിൽ വരുമെന്ന് പ്രഖ്യാപിച്ചിരുന്നു. ഇതിന് പിന്നാലെയാണ് ഇപ്പോൾ വേഗതയേറിയ നടപടികളിലൂടെ സർക്കാർ ഉത്തരവ് പുറപ്പെടുവിച്ചിരിക്കുന്നത്. ഇതോടെ ഇന്ത്യയിൽ ആദ്യമായി വയോജനങ്ങൾക്കായി മാത്രമായി ഒരു പ്രത്യേക വകുപ്പ് രൂപീകരിക്കുന്ന ആദ്യ സംസ്ഥാനമെന്ന ചരിത്ര നേട്ടം കേരളം സ്വന്തമാക്കി.

ലോകത്ത് വയോജന സംരക്ഷണത്തിൽ ഏറ്റവും മികച്ച മാതൃകകൾ പിന്തുടരുന്ന ജപ്പാൻ ഉൾപ്പെടെയുള്ള വിദേശ രാജ്യങ്ങളുടെ പ്രവർത്തന രീതികൾ കൃത്യമായി പഠിച്ച്, കേരളത്തിലെ മുതിർന്ന പൗരന്മാരുടെ ജീവിത നിലവാരം ഉയർത്തുന്നതിനുള്ള സമഗ്രമായ വികസന പദ്ധതികൾ തയ്യാറാക്കുക എന്നതാണ് ഈ പുതിയ വകുപ്പിലൂടെ സർക്കാർ ലക്ഷ്യമിടുന്നത്. വർദ്ധിച്ചുവരുന്ന വയോജന ജനസംഖ്യ കണക്കിലെടുത്ത് അവരുടെ ആരോഗ്യം, സാമൂഹിക സുരക്ഷ, മാനസിക ഉല്ലാസം എന്നിവ മുൻനിർത്തിയുള്ള വിപ്ലവകരമായ ഇടപെടലുകൾക്ക് ഈ പുതിയ വകുപ്പ് തുടക്കം കുറിക്കും.