ശബരിമലയിലേക്കുള്ള നെയ്യ് വിതരണം വീണ്ടും മിൽമയെ ഏൽപ്പിച്ച് തിരുവിതാംകൂർ ദേവസ്വം ബോർഡ്. ഇതിന്റെ ഭാഗമായി 5,000 ലിറ്റർ നെയ്യ് മിൽമ ഇന്ന് ശബരിമലയിലേക്ക് അയക്കും. വിജിലൻസിന്റെ അനുമതി ലഭിച്ചതോടെയാണ് മിൽമയും ദേവസ്വം ബോർഡും തമ്മിൽ ധാരണയിലെത്തിയത്. മുൻവർഷം നെയ്യ് വഴിമധ്യേ മറിച്ചുവിറ്റെന്ന ക്രമക്കേട് കേസ് നിലനിൽക്കുന്ന സാഹചര്യത്തിൽ ഇത്തവണ മിൽമയുടെ സ്വന്തം വാഹനത്തിലാണ് നെയ്യ് പമ്പയിലെത്തിക്കുന്നത്.

കഴിഞ്ഞവർഷം ശബരിമലയിലേക്കുള്ള മിൽമ നെയ്യ് വഴിമധ്യേ മറിച്ചുവിറ്റ് പകരം ഗുണനിലവാരം കുറഞ്ഞ നെയ്യ് സന്നിധാനത്ത് എത്തിച്ചെന്ന പരാതിയിലാണ് അന്വേഷണം നടക്കുന്നത്. ഇതേത്തുടർന്ന് മിൽമയെ ഒഴിവാക്കി ദേവസ്വം ബോർഡ് ആദ്യം റീ ടെൻഡർ വിളിച്ചിരുന്നു. എന്നാൽ നെയ്യ് ക്രമക്കേട് കേസിൽ ആരോപണവിധേയനായ തമിഴ്നാട് സ്വദേശിയായ കരാറുകാരൻ മാത്രമാണ് ടെൻഡറിൽ പങ്കെടുത്തത്. ഇതോടെ റീ ടെൻഡർ നടപടികൾ ബോർഡ് ഒഴിവാക്കി. പിന്നീട് വീണ്ടും ടെൻഡർ ക്ഷണിച്ചെങ്കിലും മറ്റ് കരാറുകാർ ആരും മുന്നോട്ടുവന്നില്ല. ഇതോടെയാണ് മിൽമയെ തന്നെ ആശ്രയിക്കാൻ തീരുമാനിച്ചത്.

അടിയന്തരമായി 10,000 ലിറ്റർ നെയ്യ് നൽകണമെന്നാണ് ദേവസ്വം ബോർഡ് മിൽമയോട് ആവശ്യപ്പെട്ടിരിക്കുന്നത്. ഇതിൽ ആദ്യഘട്ടമായി 5,000 ലിറ്റർ ഇന്ന് കൈമാറും. ഭക്ഷ്യസുരക്ഷാ വിഭാഗത്തിന്റെ പരിശോധന ഉൾപ്പെടെ ഗുണനിലവാര പരിശോധനകൾ പൂർത്തിയാക്കിയ ശേഷമായിരിക്കും നെയ്യ് വിതരണം ചെയ്യുക.

ആകെ 50,000 ലിറ്റർ നെയ്യാണ് ദേവസ്വം ബോർഡ് മിൽമയോട് ആവശ്യപ്പെട്ടിരിക്കുന്നത്. എന്നാൽ ഭക്തർ വഴിപാടായും മറ്റും എത്തിക്കുന്ന നെയ്യിന്റെ അളവ് ആവശ്യത്തിന് തികയുമോയെന്ന് പരിശോധിച്ച ശേഷമായിരിക്കും തുടർകരാറിൽ തീരുമാനമെടുക്കുക. ഒരു ലിറ്റർ നെയ്യിന് 660 രൂപയാണ് മിൽമ ദേവസ്വം ബോർഡിനോട് ആവശ്യപ്പെട്ടിരിക്കുന്നത്.

അതേസമയം, നെയ്യ് മറിച്ചുവിറ്റ കേസിൽ രണ്ട് പേരെ വിജിലൻസ് അറസ്റ്റ് ചെയ്തിട്ടുണ്ട്. ഇടപാടിൽ പങ്കുണ്ടെന്ന് സംശയിക്കുന്ന ദേവസ്വം ബോർഡ് സ്റ്റോർ സൂപ്രണ്ട് ഇപ്പോഴും ഒളിവിലാണ്. ഇയാളെ ചോദ്യം ചെയ്യുന്നതിലൂടെ ക്രമക്കേടിൽ കൂടുതൽ പേരുടെ പങ്കാളിത്തം പുറത്തുവരുമെന്നാണ് വിജിലൻസിന്റെ പ്രതീക്ഷ. മുൻവർഷത്തെ വിവാദത്തിന്റെ പശ്ചാത്തലത്തിൽ ഇത്തവണ നെയ്യ് വിതരണത്തിൽ കർശന നിരീക്ഷണവും ഗുണനിലവാര പരിശോധനയും ഉറപ്പാക്കേണ്ടതുണ്ട്.