ഉത്തർപ്രദേശിലെ വിവിധ ജില്ലകളിൽ ബുധനാഴ്ചയുണ്ടായ ശക്തമായ കാറ്റിലും കനത്ത മഴയിലും മിന്നലിലുമായി 56 പേർ കൊല്ലപ്പെട്ടു. അപ്രതീക്ഷിതമായുണ്ടായ കാറ്റിൽ മരങ്ങളും വൈദ്യുത തൂണുകളും കടപുഴകി വീണും വീടുകൾ തകർന്നുമാണ് ഭൂരിഭാഗം അപകടങ്ങളും സംഭവിച്ചത്. ദുരന്തത്തിൽപ്പെട്ടവരുടെ കുടുംബങ്ങൾക്ക് 24 മണിക്കൂറിനുള്ളിൽ ആശ്വാസധനം എത്തിക്കാൻ മുഖ്യമന്ത്രി യോഗി ആദിത്യനാഥ് ഉദ്യോഗസ്ഥർക്ക് കർശന നിർദ്ദേശം നൽകി.ഏറ്റവും കൂടുതൽ മരണം റിപ്പോർട്ട് ചെയ്തത് പ്രയാഗ്‌രാജ് ജില്ലയിലാണ്; 17 പേർ ഇവിടെ മരിച്ചു. ഭദോഹിയിൽ 16-ഉം ഫത്തേപ്പൂരിൽ ഒൻപതും പേർക്ക് ജീവൻ നഷ്ടമായി. ബദായൂൻ (5), പ്രതാപ്ഗഡ് (4), ചന്ദൗലി (2), കുശിനഗർ (2), സോൻഭദ്ര (1) എന്നിങ്ങനെയാണ് മറ്റ് ജില്ലകളിലെ മരണസംഖ്യ.

പ്രയാഗ്‌രാജ്: ഹന്ദിയ മേഖലയിൽ മാത്രം ഏഴ് പേർ മരിച്ചു. ഫുൽപൂർ, സോറാവോൺ, മേജ എന്നിവിടങ്ങളിലും മരണങ്ങൾ റിപ്പോർട്ട് ചെയ്തു.

ഭദോഹി: മരങ്ങൾ വീണും വീടുകൾ തകർന്നുമാണ് ഇവിടെ 16 പേർ മരിച്ചത്. വൈദ്യുതി ബന്ധം പലയിടത്തും തകരാറിലായി.

ഫത്തേപ്പൂർ: മരിച്ച ഒൻപത് പേരിൽ അഞ്ച് സ്ത്രീകളും ഉൾപ്പെടുന്നു. വീടിന്റെ മതിൽ ഇടിഞ്ഞുവീണാണ് ചിലർക്ക് ജീവൻ നഷ്ടമായത്.

പ്രതാപ്ഗഡ്: മിന്നലേറ്റും ഷെഡ്ഡുകൾ തകർന്നുമാണ് ഇവിടെ അപകടങ്ങൾ സംഭവിച്ചത്.

കാർഷിക മേഖലയിലും കനത്ത നാശനഷ്ടങ്ങൾ ഉണ്ടായതായാണ് റിപ്പോർട്ട്. കൃഷിനാശത്തെക്കുറിച്ച് സർവ്വേ നടത്തി റിപ്പോർട്ട് സമർപ്പിക്കാൻ റവന്യൂ, കൃഷി വകുപ്പുകൾക്കും ഇൻഷുറൻസ് കമ്പനികൾക്കും മുഖ്യമന്ത്രി നിർദ്ദേശം നൽകി. ബാധിത പ്രദേശങ്ങൾ സന്ദർശിക്കാനും ഇരകൾക്ക് ആവശ്യമായ സഹായങ്ങൾ ഉറപ്പാക്കാനും ജില്ലാ മജിസ്‌ട്രേറ്റുമാർക്കും ഉന്നത ഉദ്യോഗസ്ഥർക്കും നിർദ്ദേശം നൽകിയിട്ടുണ്ട്.