കുതിരവട്ടം മാനസികാരോഗ്യ കേന്ദ്രത്തില് നിന്നും ചാടിപ്പോയ കൊലക്കേസ് പ്രതി പിടിയില്
കുതിരവട്ടം മാനസികാരോഗ്യ ആശുപത്രിയില് നിന്നും ചാടിപ്പോയ കൊലക്കേസ് പ്രതി പിടിയില്. പെരിന്തല്മണ്ണ ദൃശ്യ കൊലക്കേസിലെ പ്രതി വിനീഷ് ആണ് പിടിയിലായത്. മുംബൈ റെയില്വേ സ്റ്റേഷനില് നിന്നാണ് പ്രതിയെ പിടികൂടിയത്. കഴിഞ്ഞ ഡിസംബര് 29നാണ് പ്രതി വിനീഷ് മാനസികാരോഗ്യകേന്ദ്രത്തില് നിന്നും ചാടിപ്പോയത്.വിചാരണ തടവുകാരനായ പ്രതി മാനസികാരോഗ്യ കേന്ദ്രത്തില് ചികിത്സയിലിരിക്കെയാണു ചാടിപ്പോയത്.ശുചിമുറിയുടെ ചുമര് തുരന്ന് പുറത്തെത്തിയശേഷം ചുറ്റുമതില് ചാടി പുറത്തു പോവുകയായിരുന്നു.പ്രതിക്കായി റെയില്വേ സ്റ്റേഷനുകളിലും ബസ് സ്റ്റാന്ഡുകളിലും പരിശോധന നടത്തിയെങ്കിലും കണ്ടെത്താനായിരുന്നില്ല. കണ്ണൂര് സെന്ട്രല് ജയിലിലെ വിചാരണ തടവുകാരനായ ഇയാളെ മാനസികാസ്വാസ്ഥ്യത്തെ തുടര്ന്ന് കോടതിയുടെ നിര്ദേശപ്രകാരമാണ് ഡിസംബര് പത്തിനു വീണ്ടും കുതിരവട്ടം ആശുപത്രിയില് പ്രവേശിപ്പിച്ചത്.