നാഷണൽ ഹെറാൾഡ് കേസിൽ എൻഫോഴ്സ്മെന്‍റ് ഡയറക്ടറേറ്റിനെതിരെ സോണിയ ഗാന്ധിയും രാഹുൽ ഗാന്ധിയും ദില്ലി ഹൈക്കോടതിയിൽ. നിയമനടപടികളുടെ ദുരുപയോഗമാണ് ഇ.ഡിയുടെ അപ്പീൽ എന്നാണ് ഗാന്ധി കുടുംബത്തിന്റെ വാദം. ഇ ഡിയുടെ ഹർജി തള്ളണമെന്നാണ് ആവശ്യം.

സോണിയ ഗാന്ധിക്കും രാഹുൽ ഗാന്ധിക്കുമെതിരായ ഇ ഡി കുറ്റപത്രത്തിൽ കേസെടുക്കാൻ റോസ് അവന്യു കോടതി വിസമ്മതിച്ചിരുന്നു. ഇത് ചോദ്യം ചെയ്താണ് ഇ ഡി ദില്ലി ഹൈക്കോടതിയെ സമീപിച്ചത്. ഇക്കാര്യത്തില്‍ സമർപ്പിച്ച മറുപടിയിലാണ് നിയമത്തിന്റെ ദുരുപയോഗമാണ് ഇഡി നടത്തുന്നതെന്ന് സോണിയ ഗാന്ധിയും രാഹുല്‍ ഗാന്ധിയും വാദിക്കുന്നത്. സ്വകാര്യ പരാതിയുടെ അടിസ്ഥാനത്തിൽ അന്വേഷണം നടത്താൻ ഇ ഡിക്ക് അധികാരമില്ലെന്നാണ് സോണിയ ഗാന്ധിയുടെയും രാഹുൽ ഗാന്ധിയുടെയും വാദം.

പി.എം.എൽ.എ പ്രകാരം പൊലീസിന്‍റെ അന്തിമ റിപ്പോർട്ടോ അധികാരപ്പെടുത്തിയ ഉദ്യോഗസ്ഥന്‍റെ പരാതിയോ ഉണ്ടായിരിക്കണം. സുബ്രമണ്യന്‍ സ്വാമിയുടെ പരാതിയിൽ ഈ രണ്ട് സാഹചര്യങ്ങളും പാലിച്ചിട്ടില്ലെന്ന് ഗാന്ധി കുടുംബം ഹൈക്കോടതിയിൽ വ്യക്തമാക്കി. സുബ്രമണ്യന്‍ സ്വാമി മജിസ്‌ട്രേറ്റ് കോടതിയിൽ നൽകിയ സ്വകാര്യ പരാതിയുടെ മാത്രം അടിസ്ഥാനത്തിൽ ഇ.ഡിക്ക് നേരിട്ട് കള്ളപ്പണം വെളുപ്പിക്കൽ കേസ് എടുക്കാനാകില്ലെന്നായിരുന്നു വിചാരണ കോടതിയുടെ നിലപാട്.ഇഡിക്ക് തിരിച്ചടിയായ കേസിലാണ് അപ്പീൽ തള്ളണമെന്ന് സോണിയും രാഹുലും വാദിക്കുന്നത്. കേസ് ഒക്ടോബർ 12ന് ഹൈക്കോടതി പരിഗണിക്കും.