ഔദ്യോഗിക വസതിയിൽ നിന്ന് കണക്കിൽപ്പെടാത്ത പണം കണ്ടെത്തിയ സംഭവത്തിൽ മുൻ ഡൽഹി ഹൈക്കോടതി ജഡ്ജി ജസ്റ്റിസ് യശ്വന്ത് വർമ്മയ്ക്ക് സുപ്രീം കോടതിയിൽ നിന്ന് വീണ്ടും തിരിച്ചടി. തന്നെ ഇംപീച്ച് ചെയ്യുന്നതിനുള്ള നടപടികളുടെ ഭാഗമായി ആരോപണങ്ങൾ അന്വേഷിക്കാൻ മൂന്നംഗ സമിതിയെ രൂപീകരിച്ചതിനെ ചോദ്യം ചെയ്ത് അദ്ദേഹം സമർപ്പിച്ച ഹർജി കോടതി തള്ളി. ജസ്റ്റിസുമാരായ ദീപാങ്കർ ദത്ത, സതീഷ് ചന്ദ്ര ശർമ്മ എന്നിവരടങ്ങിയ ബെഞ്ചാണ് ഈ ഉത്തരവിട്ടത്.

യശ്വന്ത് വർമ്മയ്‌ക്കെതിരായ ആരോപണങ്ങൾ അന്വേഷിക്കാൻ കഴിഞ്ഞ ഓഗസ്റ്റ് 12-നാണ് ലോക്‌സഭാ സ്പീക്കർ മൂന്നംഗ സമിതിയെ നിയോഗിച്ചത്. സുപ്രീം കോടതി ജഡ്ജി ജസ്റ്റിസ് അരവിന്ദ് കുമാർ, മദ്രാസ് ഹൈക്കോടതി ചീഫ് ജസ്റ്റിസ് മനീന്ദ്ര മോഹൻ ശ്രീവാസ്തവ, മുതിർന്ന അഭിഭാഷകൻ ബി. വസുദേവ ആചാര്യ എന്നിവരാണ് സമിതിയിലെ അംഗങ്ങൾ. ഈ സമിതി സമർപ്പിക്കുന്ന വസ്തുതാപരമായ റിപ്പോർട്ടിന്റെ അടിസ്ഥാനത്തിലായിരിക്കും അദ്ദേഹത്തെ ഇംപീച്ച് ചെയ്യുന്നതുൾപ്പെടെയുള്ള തുടർനടപടികൾ സ്വീകരിക്കുക. നേരത്തെ ഇംപീച്ച്‌മെന്റ് നടപടികൾ ചോദ്യം ചെയ്തുള്ള ഹർജിയും സുപ്രീം കോടതി തള്ളിയിരുന്നു.

സംഭവത്തിന്റെ പശ്ചാത്തലം: 2025 മാർച്ചിൽ ഡൽഹി ഹൈക്കോടതി ജഡ്ജിയായിരിക്കെ യശ്വന്ത് വർമ്മയുടെ വസതിയിലെ സ്റ്റോർ റൂമിലുണ്ടായ തീപിടുത്തത്തെത്തുടർന്നാണ് വിവാദങ്ങളുടെ തുടക്കം. തീ അണയ്ക്കാനെത്തിയ ഫയർഫോഴ്സും പോലീസും ചാക്കുകളിൽ കെട്ടിയ നിലയിൽ വൻതോതിൽ നോട്ടുകെട്ടുകൾ കണ്ടെത്തുകയായിരുന്നു. ഇതേത്തുടർന്ന് സുപ്രീം കോടതി നിയോഗിച്ച ആഭ്യന്തര സമിതിയും അദ്ദേഹം കുറ്റക്കാരനാണെന്ന് കണ്ടെത്തിയിരുന്നു. എന്നാൽ ആരോപണങ്ങൾ ഗൂഢാലോചനയാണെന്നും തെളിവുകളില്ലെന്നുമാണ് യശ്വന്ത് വർമ്മയുടെ വാദം. നിലവിൽ ജുഡീഷ്യൽ ചുമതലകളിൽ നിന്ന് മാറ്റിയിട്ടുണ്ടെങ്കിലും അദ്ദേഹം അലഹബാദ് ഹൈക്കോടതി ജഡ്ജിയായി തുടരുകയാണ്.