പങ്കാളി അരികില് ഇല്ലെങ്കിലും ഒരു മനസ്സായ് നീങ്ങാം; ഇതാ ചില വഴികൾ
വൈകാരിക അടുപ്പം
തമ്മില്‍ കാണാന്‍ കഴിയാത്തതിലുള്ള നിരാശ, പങ്കളിയെക്കുറിച്ചുള്ള തെറ്റിധാരണകള്‍, പൂര്‍ത്തീകരിക്കാത്ത ലൈംഗിക ആവശ്യങ്ങള്‍, തുടങ്ങി നിരവധി കാര്യങ്ങള്‍ മറികടന്നാല്‍ മാത്രമേ ഇത്തരം ബന്ധങ്ങള്‍ മനോഹരമായി മുന്നോട്ട് കൊണ്ടുപോകാന്‍ കഴിയൂ. അതിനു വൈകാരികമായ അടുപ്പം നിര്‍ബന്ധമാണ്‌.
2009 ൽ ബെർലിനിലെ ഹംബോൾട്ട് യൂണിവേഴ്സിറ്റി പ്രസിദ്ധീകരിച്ച ഒരു പഠനത്തിൽ പറയുന്നത്, ഒരുമിച്ച് താമസിക്കുന്ന ദമ്പതികളേക്കാള്‍ കൂടുതല്‍ ധാരണയും നല്ല ആശയ വിനിമയ നിലവാരവും വിശ്വാസവുമെല്ലാം ഉയര്‍ന്നു നില്‍ക്കുന്നത് അകന്നു കഴിയുന്ന ദമ്പതികളിലാണ് എന്നാണ്. പരസ്പരം അകന്നു കഴിയുമ്പോള്‍ പങ്കാളിയുമായി ആശയവിനിമയം നടത്താനുള്ള ഏറ്റവും മികച്ച വഴികള്‍ ഇവയാണ്:
സ്വയം തയ്യാറെടുക്കുക
വിവാഹ ബന്ധത്തിലേക്ക് കടക്കും മുൻപ് തന്നെ പങ്കാളിയെ വ്യക്തമായി മനസിലാക്കുക എന്നത് പ്രധാനമാണ്. അവരുടെ കാഴ്ചപ്പാടുകളും രീതികളും എല്ലാം അറിയേണ്ടത് അത്യാവശ്യവും. എല്ലാ കാര്യങ്ങളിലും തുറന്ന ചിന്താഗതിയുള്ള ആളുകളാണെങ്കിൽ കാര്യങ്ങള്‍ മനസിലാക്കാന്‍ എളുപ്പമാകും. ജോലിയുടെ പ്രാധാന്യവും അതിനായി വിട്ടു നില്‍ക്കുന്നത് ഒരു ചെറിയ കാര്യമാണെന്നും പരസ്പരം മനസിലാക്കാന്‍ ശ്രമിക്കുക, അല്ലെങ്കില്‍ വിവാഹം കഴിഞ്ഞ ശേഷം ഇത് ഒരു പ്രശ്നമായി മാറിയേക്കാം. ജോലിയുമായി ബന്ധപ്പെട്ട് മാറി നില്‍ക്കേണ്ടി വരുന്ന സാഹചര്യത്തില്‍ അത് എങ്ങനെ കൈകാര്യം ചെയ്യണം എന്ന കാര്യങ്ങളും തുടക്കത്തിലേ ചര്‍ച്ച ചെയ്യണം. വിവാഹത്തിന് മുന്‍പ് തന്നെ, വിവാഹശേഷം പങ്കാളി ഇപ്പോഴും അടുത്തുണ്ടാകില്ല എന്ന സാഹചര്യത്തെക്കുറിച്ച് വ്യക്തമായ ധാരണയില്‍ ഉണ്ടായാൽ അടുത്തില്ല എന്ന പ്രയാസത്തെ മറികടക്കാന്‍ രണ്ടു പേര്‍ക്കും കഴിയും.
വിശ്വാസമാണ് അടിത്തറ
ബന്ധങ്ങളുടെ അടിത്തറയാണ് വിശ്വാസം. ഇത് പറഞ്ഞു ബോധ്യപ്പെടുത്താവുന്ന ഒന്നല്ല. സമയമെടുത്ത് മാത്രം ഇരുവരുടെയും മനസ്സില്‍ സ്വാഭാവികമായി തോന്നേണ്ടതാണ്. പെരുമാറ്റ രീതികളിലൂടെ പങ്കാളി മനസിലാക്കുന്നിടത്താണ് വിശ്വാസം ജനിക്കുന്നത്. സംസാരവും പ്രവര്‍ത്തിയും ഒരുപോലെ മികച്ചതകുമ്പോള്‍ മാത്രമാണ് നിങ്ങള്‍ ആത്മാര്‍ഥതയുള്ള വ്യക്തിയാണെന്ന് പങ്കാളിയ്ക്ക് ബോധ്യപ്പെടൂ. ഇക്കാര്യം എല്ലായ്പോഴും ഓർക്കുക. വിശ്വാസം ഉറപ്പിക്കുന്നതിനായി നിങ്ങളുടെ ചുമതലകൾ ഭംഗിയായി കൈകാര്യം ചെയ്യുന്നുവെന്ന് ഉറപ്പാക്കുക. എന്തെങ്കിലും വാഗ്ദാനങ്ങൾ നടപ്പാക്കാൻ കഴിയുന്നില്ല എങ്കിൽ അതിന്റെ വിശദീകരണം സ്നേഹപൂർവ്വം പങ്കാളിയെ പറഞ്ഞു ബോധ്യപ്പെടുത്തുക. ഇങ്ങനെ ചെയ്യുന്നതിലൂടെ ഇരുവർക്കുമിടയിൽ എല്ലാ കാര്യങ്ങളും തുറന്ന് പറയാനുള്ള സ്വാതന്ത്ര്യം ഉണ്ടെന്ന തോന്നൽ കൊണ്ടുവരാനാകും.
ഏതെല്ലാം കാര്യങ്ങളാണ് പങ്കാളിയ്ക്കും തനിക്കുമിടയിൽ അഭിപ്രായ വ്യത്യാസങ്ങൾക്ക് കാരണമാകുന്നത് എന്ന് മനസിലാക്കുകയും രണ്ട് പേരും അതിനോട് സമരസപ്പെടുകയും ചെയ്യുക പ്രധാനമാണ്. തർക്കങ്ങൾ ഉണ്ടാവുകയാണെങ്കിൽ ശാന്തമായി സംസാരിച്ച് തീർക്കണം എന്ന് പരസ്പരം ധാരണയുള്ളതും പല പ്രശ്നങ്ങളെയും അതി ജീവിക്കാൻ സഹായിക്കും.
സോറി പറയാൻ മടി വേണ്ട
ഭാര്യയായാലും ഭർത്താവായാലും തന്റെ ഭാഗത്ത് എന്തെങ്കിലും തെറ്റ് സംഭവിച്ചാൽ സോറി പറയാൻ മടി കാണിക്കരുത്. ഇന്ന് പല ബന്ധങ്ങളും തകരുന്നത് ഈ ഒരു കാര്യത്തിൽ വിട്ടുവീഴ്ച ചെയ്യാൻ മനസ്സ് കാണിക്കാത്തത് കൊണ്ടാണ്. മറ്റെയാൾ ആദ്യം സോറി പറയെട്ടെ എന്ന് ഇരുകൂട്ടരും വിചാരിച്ചിരിക്കും. ക്ഷമ ചോദിക്കുന്നത് ഒരിക്കലും ഒരു വില കുറഞ്ഞ കാര്യമല്ല, മറിച്ച് നിങ്ങളുടെ ഉയർന്ന ചിന്താഗതിയാണ് ഇത് സൂചിപ്പിക്കുന്നത്. അങ്ങനെ ചെയ്യുകയാണെങ്കിൽ പങ്കാളി തിരിച്ച് നിങ്ങളോടും അതുപോലെ പെരുമാറും. കുഞ്ഞു കാര്യങ്ങൾക്ക് പോലും നന്ദി പറയുകയും സ്നേഹം പങ്കിടുകയും ചെയ്യുന്നത് ബന്ധം ദൃഢമാക്കും.
പരിധി കടക്കാതിരിക്കാൻ ശ്രദ്ധിക്കുക
പങ്കാളിയെ പിരിഞ്ഞിരിക്കുന്നത് പ്രയാസമുള്ള കാര്യം തന്നെയാണ്. എന്നാൽ എല്ലായ്പോഴും വിളിച്ചുകൊണ്ടിരിക്കുകയും ഓരോരോ കാര്യങ്ങളും വിശദമായി ചോദിച്ചുകൊണ്ടിരിക്കുന്നതും ക്രമേണ അലോസരമുണ്ടാക്കാൻ വഴിയൊരുക്കും. ആദ്യ നാളുകളിൽ ഇത് കരുതലിന്റെ ഭാഗമായി കരുത്തുമെങ്കിലും പിന്നീട് അനാവശ്യ കൈകടത്താലുകളായി അനുഭവപ്പെടാൻ സാധ്യതയുണ്ട്. കുഞ്ഞു കാര്യങ്ങൾക്ക് പോലും അമിതമായി ഇടപെടുന്നത് നിങ്ങളുടെ വിശ്വാസമില്ലായ്മയായി തെറ്റിദ്ധരിക്കപ്പെടുകയും ചെയ്യും. മാത്രമല്ല, ഫോൺ ചെയ്യുമ്പോൾ പങ്കാളിയുടെ കൂടെ സമയവും സൗകര്യവും പരിഗണിക്കണം. പങ്കാളി നിങ്ങളുടെ സ്വകാര്യ സ്വത്തല്ല, മറിച്ച് അവർക്ക് ജോലി, കുടുംബത്തോടുള്ള ഉത്തരവാദിത്തം, കഴിവുകൾ വികസിപ്പിക്കൽ തുടങ്ങി വിവിധ തലങ്ങൾ ജീവിതത്തിൽ ഉണ്ട്. അതിനാൽ അവയ്ക്ക് കൂടി സമയം നൽകിക്കൊണ്ടാവണം നിങ്ങളുടെ പ്രണയം പങ്കിടാൻ സമയം കണ്ടെത്തേണ്ടത്.
നല്ല ചേരുവകൾ
ഏത് ബന്ധവും വിജയിക്കണമെങ്കിൽ ചില വിട്ടുവീഴ്ചകളും അഡ്ജസ്റ്റ്മെന്റും ഒക്കെ വേണ്ടി വരും. മികച്ച മാനസികാരോഗ്യ നില, പോസിറ്റീവ് ചിന്താഗതി, ലൈംഗിക സംതൃപ്തി, പങ്കാളിയുടെ സ്വാതന്ത്ര്യത്തെ പരിഗണിക്കൽ, നല്ല രീതിയിലുള്ള ആശയ വിനിമയം, ക്ഷമ, എല്ലാം ഉൾക്കൊള്ളാനുള്ള കഴിവ് എന്നിവയെല്ലാം നല്ല ബന്ധത്തിനുള്ള മികച്ച ചേരുവകളാണ്. വ്യക്തി സ്വാതന്ത്ര്യത്തെ ബാധിയ്ക്കാത്ത തരത്തിലുള്ള ചില കാര്യങ്ങളിൽ ചില അഡ്ജസ്റ്റ്മെന്റുകൾക്ക് ഇരുകൂട്ടരും തയ്യാറാകണം എന്നതും പ്രധാനമാണ്. ഇക്കാര്യങ്ങളെല്ലാം പരിഗണിക്കുകയാണെങ്കിൽ ഏറെക്കാലം മനോഹരമായ ദാമ്പത്യ ബന്ധം നയിക്കാൻ കഴിയുമെന്നാണ് സർവേകളിൽ നിന്ന് മനസിലാകുന്നത്.
മുൻവിധികൾ വേണ്ട
വിവാഹത്തിന്റെ മനോഹാരിത നിറഞ്ഞു നിൽക്കുന്നതാണ് ആദ്യ നാളുകൾ. സ്നേഹവും സന്തോഷവും മാത്രം. എന്നാൽ പിന്നീട് ഇത് ക്രമേണ കുറഞ്ഞു വരാം. പങ്കാളി അടുത്തില്ലെങ്കിൽ ഫോൺ വിളികൾക്ക് മറുപടി നൽകാതിരിക്കുകയോ നിങ്ങൾ ആഗ്രഹിക്കുന്നത് പോലെ കാണാനോ നല്ല നിമിഷങ്ങൾ പങ്കിടാനോ താല്പര്യം കാണിക്കുന്നില്ലെങ്കിലോ ഉടൻ മുൻവിധികളിലേക്ക് പോകാതിരിക്കുക. പകരം എന്തായിരുന്നു കാരണമെന്ന് സമാധാനപരമായും സ്നേഹത്തോടെയും ചോദിച്ചു മനസിലാക്കുക. ഒരു പക്ഷേ വളരെ ലളിതമായ ചില കാര്യങ്ങളാകാം ഇതിന് പിന്നിൽ. അത് സംസാരിക്കുകയും രണ്ട് പേർക്കും അനുയോജ്യമായ രീതിയിൽ കാര്യങ്ങൾ മുന്നോട്ട് കൊണ്ടുപോകുകയും ചെയ്യുന്നത് ബന്ധങ്ങളിൽ വിള്ളലുകൾ വീഴാതെ സൂക്ഷിക്കും.
സത്യസന്ധത പുലർത്തുക
സ്നേഹം മാത്രം പോരാ, ഏത് ബന്ധങ്ങളിലും സത്യസന്ധത പുലർത്തേണ്ടതും പരമപ്രധാനമാണ്, ദാമ്പത്യത്തിൽ പ്രത്യേകിച്ചും. എല്ലായ്പോഴും സത്യം മാത്രം പറയുക എന്നത് ദീർഘ കാലത്തേക്ക് ബന്ധം നിലനിർത്താനുള്ള ഏറ്റവും മികച്ച വഴിയാണ്. പങ്കാളിയോട് എല്ലാ കാര്യങ്ങളും തുറന്ന് പറയുന്നത് ഒരു നല്ല സുഹൃത്തിനേക്കൂടെ ലഭിക്കുന്നതിന് വഴിയൊരുക്കും. തനിക്ക് അംഗീകരിക്കാൻ കഴിയാത്ത കാര്യങ്ങൾ പോലും തുറന്ന് പറയാനുള്ള അത്ര അടുപ്പമുണ്ടാകുന്നത് ബന്ധം മനോഹരമാക്കാൻ സഹായിക്കും. പങ്കാളിയ്ക്ക് ഇഷ്ടമില്ലാത്ത കാര്യങ്ങൾ പറയുമ്പോൾ അല്പം സ്നേഹത്തോടെ അവതരിപ്പിച്ചു നോക്കൂ, ഒരു കാര്യവും മറച്ചു വെക്കാത്ത നങ്ങളുടെ രീതി അവർ മനസ് കൊണ്ട് ഏറെ അംഗീകരിക്കും.