ക്യാൻസർ രോഗത്തെ ചെറുക്കാൻ ഇക്കാര്യങ്ങളിൽ കരുതൽ വേണം
സമീപ നളുകളിൽ മരുന്ന് കണ്ടെത്തുമെന്ന് കരുതുന്നതും ഇപ്പോൾ വില്ലനാവുകയും ചെയ്യുന്ന രോഗമാണ് ക്യാൻസർ. ക്യാൻസർ കൂടാൻ പല കാരണങ്ങളുണ്ട്. അവയിൽ ചിലത് നോക്കാം. ജീവിത ശൈലിയില്‍ വന്ന മാറ്റമാണ് പലപ്പോഴും ക്യാൻസർ വരാനുള്ള ഒരു പ്രധാന കാരണമായി വൈദ്യശാസ്ത്രം പറയുന്നത്. മോശം ഭക്ഷണശീലം, ഉദാസീനമായ ജീവിതരീതി, വ്യായാമമില്ലായ്മ തുടങ്ങിയവയൊക്കെ ക്യാന്‍സര്‍ സാധ്യതയെ കൂട്ടാം. ക്യാൻസര്‍ സാധ്യത കൂട്ടുന്ന പ്രധാനവും സാധാരണവുമായ കാരണമാണ് പുകവലിയും പുകയിലയുടെ ഉപയോഗവും. ലോകവ്യാപകമായി ഇതിനെതിരെ ബോധവത്കരണം നടക്കുന്നുവെങ്കിലും ഇക്കാരണങ്ങള്‍ കൊണ്ടുള്ള ക്യാൻസർ ബാധയും മരണവും വർധിക്കുകയാണ്.
അമിത മദ്യപാനം ക്യാൻസറിനുള്ള സാധ്യത വർധിപ്പിക്കും. പാൻക്രിയാസ്, ഉദരം, കരള്‍ എന്നിവിടങ്ങളിലെ ക്യാൻസറിനുള്ള സാധ്യത വർധിപ്പിക്കുന്നതാണ് മദ്യപാനം. ദീർഘകാലാടിസ്ഥാനത്തിൽ മദ്യപാനം കരൾ ക്യാൻസറിനു വഴിവെക്കും. വായ, തൊണ്ട, കുടൽ, മലാശയം എന്നിവിടങ്ങളിലെ ക്യാൻസറിനും മദ്യപാനം കാരണമാകാറുണ്ട്.
അമിതവണ്ണമുള്ളവരില്‍ ക്യാന്‍സര്‍ ഉണ്ടാകുമെന്നല്ല. അമിതവണ്ണം പലപ്പോഴും ഇതിന്‍റെ ഘടമാണ്. അമിത വണ്ണത്തിന്‍റെ കാരണം കണ്ടെത്തി പരിഹരിക്കുക. മികച്ച ശാരീരിക ക്ഷമതയും ആരോഗ്യവും നിലനിർത്തുകയാണ് ക്യാൻസറിനെ ചെറുക്കാനുള്ള പോംവഴി.
അമിതമായി വെയിൽ കൊള്ളുന്നത് ശരീരത്തിൽ അൾട്രാവയലറ്റ് രശ്മികൾ ഏൽക്കാൻ ഇടയാക്കുകയും ഇത് മെലനോമ എന്ന ത്വക്ക് ക്യാൻസറിന് കാരണമാവുകയും ചെയ്യും. അമിതമായി അൾട്രാവയലറ്റ് രശ്മികൾ ഏൽക്കുന്നത് ത്വക്കിലെ ഡിഎൻഎയുടെ നാശത്തിന് കാരണമാവുകയും ഇത് കോശങ്ങളുടെ അമിതവളർച്ചക്ക് കാരണമായി ക്യാന്‍സറിലേക്ക് എത്തിക്കുകയുമാണ് ചെയ്യുന്നത്. അതില്‍ വെയിൽകൊള്ളുന്നത് കുറയ്ക്കാന്‍ ശ്രമിക്കുക.
ചുവന്നതും സംസ്ക്കരിച്ചതുമായ മാംസത്തിന്‍റെ അമിത ഉപയോഗം ക്യാൻസർ സാധ്യത കൂട്ടും. ശീതികരിച്ചതും മസാലയിട്ടതും ഉപ്പിട്ടതുമായി വിവിധ രീതിയിൽ സൂക്ഷിച്ച മാംസം വാങ്ങി കഴിക്കുന്നത് പരമാവധി ഒഴിവാക്കുക. അതുപോലെ ജങ്ക് ഫുഡ്, മധുരം അമിതമായി ഉപയോഗിച്ച സോഡ തുടങ്ങിയവയുടെ ഉപയോഗവും കുറയ്ക്കുക. പകരം പഴങ്ങളും പച്ചക്കറികളും, ഫൈബറും ആന്‍റി ഓക്സിഡന്‍റുകളും അടങ്ങിയ ഭക്ഷണങ്ങളും ഡയറ്റില്‍ ഉള്‍പ്പെടുത്തുക.