മണ്‍ചട്ടി പൂപ്പല് പിടിക്കാതെ വൃത്തിയാക്കി സൂക്ഷിക്കണം; ഇതാ ചില എളുപ്പവഴികൾ
മണ്‍ചട്ടിയില്‍ വെക്കുന്ന ഓരോ കറിയ്ക്കും അതിന്റേതായ പ്രത്യേക സ്വാദാണ് ഉള്ളത്. ചിലര്‍ സാമ്പാര്‍ വെക്കാന്‍ മണ്‍ചട്ടി ഉപയോഗിക്കാറുണ്ട്. മിക്കവരും മീന്‍ കറി വെക്കുന്നത് മണ്‍ചട്ടിയില്‍ ആയിരിക്കും. മണ്‍ചട്ടി സ്ഥിരമായി ഉപയോഗിച്ച് കഴിയുമ്പോള്‍ അതില്‍ എണ്ണ മയവുമെല്ലാം പറ്റിപിടിച്ച് അടിഭാഗം വൃത്തികേടായി ഇരിക്കുന്നത് കാണാം. ഇത്തരത്തില്‍ മണ്‍പാത്രങ്ങള്‍ അഴുക്ക് പിടിച്ച തുടങ്ങിയാല്‍ നമ്മള്‍ക്ക് വീട്ടില്‍ തന്നെ ഇത് എങ്ങിനെ വൃത്തിയാക്കി എടുക്കാം എന്ന് നോക്കാം. അതുപോലെ, ഇത് പൂപ്പല് പിടിക്കാതിരിക്കാന്‍ എന്തെല്ലാം ചെയ്യണം എന്നും നോക്കാം.
മണ്‍ചട്ടി വൃത്തിയാക്കുമ്പോള്‍
മണ്‍ചട്ടി വൃത്തിയാക്കാന്‍ ഒരിക്കലും സോപ്പ് ഉപയോഗിക്കരുത്. സോപ്പിന്റെ അംശം അത്രപെട്ടെന്ന് മണ്‍ചട്ടിയില്‍ നിന്നും പോവുകയില്ല, അതിന്റെ മണം ഇതില്‍ പറ്റി പിടിച്ച് നില്‍ക്കുകയും ചെയ്യും. പണ്ട് കാലത്ത് മണ്‍ചട്ടിയെല്ലാം ചാരം ഉപയോഗിച്ചാണ് വൃത്തിയാക്കിയിരുന്നത്. ഇത് ചട്ടി വൃത്തിയാക്കി എടുക്കുകയും ചെയ്തിരുന്നു.
അതുപോലെ തന്നെ ചട്ടി വൃത്തിയാക്കി എടുക്കാന്‍ ഇന്ന് പലരും ഉപയോഗിക്കുന്ന മെറ്റല്‍ സ്‌ക്രബര്‍ ഉപയോഗിക്കരുത്. എപ്പോഴും നല്ല സോഫ്റ്റായിട്ടുള്ള ഒരു സ്‌ക്രബര്‍ ഉപയോഗിക്കുന്നതാണ് നല്ലത്.
വൃത്തിയാക്കാം
ആദ്യം തന്നെ ചട്ടിയില്‍ കുറച്ച് വെള്ളം ഒഴിക്കുക. ഇതിലേയ്ക്ക് കുറച്ച് സോഡ പൊടി മിക്‌സ് ചെയ്തത് ചേര്‍ത്ത് അടുപ്പത്ത് വെക്കണം. ഇതിലേയ്ക്ക് ചെറുനാരങ്ങയുടെ തൊണ്ട്, അല്ലെങ്കില്‍ ചെറുനാരങ്ങ ചെറിയ കഷ്ണങ്ങളാക്കി മുറുക്കിയത് ഇതില്‍ ചേര്‍ത്ത് നന്നായി തിളപ്പിച്ച് എടുക്കണം.
ഇത് നന്നായി തിളച്ചതിന് ശേഷം വെള്ളം കളഞ്ഞ് വെക്കണം. ചട്ടിയുടെ ചൂട് ഒന്ന് കുറഞ്ഞതിന് ശേഷം ഇതിലേയ്ക്ക് കുറച്ച് കടലപ്പൊടി ചേര്‍ത്ത് സാധാ സോഫ്റ്റ് സ്‌ക്രബര്‍ ഉപയോഗിച്ച് കഴുകി എടുക്കാവുന്നതാണ്.
പൂപ്പല് പിടിക്കാതിരിക്കാന്‍
മണ്‍ചട്ടിയില്‍ ഈര്‍പ്പം ഇരിക്കും തോറും അതില്‍ പൂപ്പല് പിടിക്കാനുള്ള സാധ്യത വളരെ കൂടുതലാണ്. ഇത് വരാതിരിക്കാന്‍ നമ്മള്‍ക്ക് ചെയ്യാവുന്ന ഏറ്റവും നല്ല കാര്യമാണ് ഇത് വൃത്തിയാക്കിയതിന് ശേഷം വെയിലത്ത് വെക്കുക എന്നത്. നന്നായി ഉണക്കിയെടുത്തതിന് ശേഷം ഇതിലേയ്ക്ക് കുറച്ച് വെളിച്ചെണ്ണ എടുത്ത് പുരട്ടി ന്യൂസ് പേപ്പര്‍ ഉപയോഗിച്ച് പൊതിഞ്ഞ് സൂക്ഷിച്ച് വെക്കാവുന്നതാണ്.
ഇത്തരത്തില്‍ ചെയ്താല്‍ മണ്‍ചട്ടി പൂപ്പല് പിടിക്കാതെ നിങ്ങള്‍ക്ക് സൂക്ഷിക്കാന്‍ സാധിക്കുന്നതും ആണ്. ഇത്തരത്തില്‍ മാസത്തില്‍ ഒരിക്കല്‍ സൂക്ഷിച്ചാല്‍ നിങ്ങള്‍ക്ക് നല്ലരീതിയില്‍ മണ്‍ചട്ടി സൂക്ഷിക്കാവുന്നതാണ്.
മണ്‍ചട്ടി ഉപയോഗിച്ചാല്‍ ഗുണങ്ങള്‍
മണ്‍ചട്ടി ഉപയോഗിച്ചാല്‍ നമ്മള്‍ കഴിക്കുന്ന ആഹാരത്തിലേയ്ക്ക് മഗ്‌നീഷ്യം, കാല്‍സ്യം, ഫോസ്ഫറസ്, അയേണ്‍, സള്‍ഫര്‍ എന്നിവയെല്ലാം നമ്മളുടെ ശരീരത്തിലേയ്ക്ക് എത്തുന്നതിന് സഹായിക്കുന്നുണ്ട്. അതുപോലെ തന്നെ, നമ്മള്‍ കഴിക്കുന്ന ആഹാരം കൃത്യമായി ദഹിക്കുന്നതിനും ആഹാരത്തിന് നല്ല സ്വാദ് കൂട്ടുന്നതിനുമെല്ലാം മണ്‍ചട്ടി ഉപയോഗിക്കുന്നത് നല്ലതാണ്.
ആഹാര സാധനങ്ങള്‍ കേടാകാതെ സൂക്ഷിക്കാന്‍ മണ്‍ചട്ടി ഉപയോഗം നല്ലത് തന്നെ. മണ്‍കൂജയില്‍ വെള്ളം ഒഴിച്ച് വെക്കുന്നതെല്ലാം വെള്ളത്തിന് നാച്വറല്‍ കൂളിംഗ് ലഭിക്കുന്നതിന് സഹായിക്കുന്നുണ്ട്.