കോഴിക്കോട് ജില്ലയിൽ വീണ്ടും നിപ സംശയം ഉയർന്നതോടെ അതീവ ജാഗ്രതയിലാണ് ആരോഗ്യവകുപ്പ്. പനി ബാധിച്ച രണ്ട് പേരുടെ മരണം സ്ഥിരീകരിച്ചതോടെ സാമ്പിളുകൾ പൂനെ വൈറോളജി ഡിപ്പാർട്ട്‌മെന്റിൽ പരിശോധനയ്ക്ക് അയച്ചിരിക്കുകയാണ്. നിലവിൽ നാല് പേരാണ് രോഗം സംശയത്തെ തുടർന്ന് ആശുപത്രിയിൽ ചികിത്സയിലുള്ളതെന്ന് ആരോഗ്യമന്ത്രി വീണ ജോർജ് അറിയിച്ചു.
ഇതിന്റെ ഫലം ലഭിച്ചാൽ മാത്രമേ രോഗം സ്ഥിരീകരിക്കാൻ സാധിക്കൂ.

പ്രധാന ലക്ഷണങ്ങൾ
പനിയ്ക്ക് ഒപ്പം ശരീരവേദന, തലവേദന, ക്ഷീണം, ചുമ, തൊണ്ട വേദന എന്നിവയൊക്കെ ഈ രോഗത്തിന്റെ പ്രധാന ലക്ഷണങ്ങളാണ്. ഇവയൊക്കെ തുടക്കത്തിൽ കാണിക്കുന്ന ലക്ഷണങ്ങളാണെങ്കിലും രോഗം മൂർച്ഛിക്കുന്നത് അനുസരിച്ച് ലക്ഷണങ്ങൾ കൂടുതൽ വഷളാകാം. ഛർദ്ദി, സ്ഥലകാല ബോധം നഷ്ടപ്പെടുക, രക്തസമ്മർദ്ദം ഉയരുക, ശ്വാസ തടസം, അപസ്മാരം, ബോധക്ഷയം എന്നിവയൊക്കെ പേടിക്കേണ്ട ലക്ഷണങ്ങളാണ്. തുടക്കത്തിലെ ലക്ഷണങ്ങൾ കണ്ടെത്തിയാൽ കൃത്യമായ ചികിത്സ ഉറപ്പാക്കാൻ ശ്രദ്ധിക്കുക.

മുൻകരുതലുകൾ എന്തൊക്കെ
നിപ വൈറസ് ബാധയുള്ള വവ്വാലുകളിൽ നിന്നോ പന്നികളിലോ നിന്നാണ് രോഗം പടരുന്നത്. അതുകൊണ്ട് തന്നെ ഇത്തരം ജീവികൾ ഉള്ള സ്ഥലങ്ങളിൽ താമസിക്കുന്നവർ പ്രത്യേകം ശ്രദ്ധിക്കണം. സുരക്ഷ മാർഗങ്ങൾ സ്വീകരിച്ചില്ലെങ്കിൽ വ്യക്തികളിൽ നിന്ന് വ്യക്തികളിലേക്ക് രോഗം പടരാനുള്ള സാധ്യതയും വളരെ കൂടുതലാണ്. പക്ഷികളും മൃഗങ്ങളും കടിച്ചതിന്റെ ബാക്കിയായി ലഭിക്കുന്ന പഴങ്ങൾ, പച്ചക്കറികൾ എന്നിവ കഴിക്കാതിരിക്കാൻ പ്രത്യേകം ശ്രദ്ധിക്കണം.

മാത്രമല്ല തുറന്നതും മൂടി വയ്ക്കാത്തതുമായ പാത്രങ്ങളിൽ ശേഖരിക്കുന്ന പാനീയങ്ങൾ കുടിക്കാതിരിക്കാനും പ്രത്യേകം ശ്രദ്ധിക്കുക. വൈറസ് ബാധയുള്ള വവ്വാലുകളുടെ ഉമിനീര്, കാഷ്ഠം എന്നിവയിൽ നിന്നെല്ലാം രോഗം പടരാം. അതുകൊണ്ട് തന്നെ മൂടി വയ്ക്കാത്ത പാനീയങ്ങൾ കുടിക്കാതിരിക്കുക. ജലസ്രോതസുകളായ കിണറുകൾ പോലെയുള്ളവ കൃത്യമായി മൂടി സൂക്ഷിക്കണം. അതുപോലെ തന്നെ വളർത്ത് മൃഗങ്ങളുടെ ശരീര സ്രവവും മറ്റ് വിസർജ്ജ്യവുമായി സമ്പർക്കം ഉണ്ടാകാതിരിക്കാനും ശ്രദ്ധിക്കേണ്ടത് ഏറെ പ്രധാനമാണ്.

രോഗം ബാധിതരുമായി സമ്പർക്കും പുലർത്തുന്നവർ തീർച്ചയായും മാസ്‌കും ഉപയോഗിക്കാൻ ശ്രമിക്കുക. കൃത്യമായ ഇടവേളകളിൽ കൈകൾ സോപ്പിട്ട് കഴുകുകയോ അല്ലെങ്കിൽ സാനിറ്റൈസർ ഉപയോഗിക്കുകയോ ചെയ്യാൻ ശ്രമിക്കുക. സാമൂഹിക അകലം പാലിക്കേണ്ടതും വളരെ പ്രധാനമാണ്. കൃത്യമായ കരുതലും ജാഗ്രതയുമുണ്ടെങ്കിൽ രോഗം വരാതെ ഒരു പരിധി വരെ സൂക്ഷിക്കാവുന്നതാണ്.