മുടി നാച്വറല് രീതിയില് കറുപ്പിക്കാം; തൈര് കൊണ്ട് ഒരു ഹെയര് ഡൈ വീട്ടില് തന്നെ തയ്യാറാക്കാം
മുടി നര അകറ്റാന് പലരും സ്വീകരിയ്ക്കുന്ന കൃത്രിമ ഡൈ പല ആരോഗ്യപ്രശ്നങ്ങള് വരെയുണ്ടാക്കാന് സാധ്യതയേറെയാണ്. പലര്ക്കും ചര്മത്തിന് അലര്ജി പ്രശ്നങ്ങളുണ്ടാകുന്നു. ചര്മത്തിനും ശിരോചര്മത്തിനും ഇത് ചിലപ്പോള് പ്രശ്നങ്ങളുണ്ടാക്കുന്നു. മുടിയില് കറുപ്പ് നല്കുന്ന ഇത്തരം വസ്തുക്കളില് പലപ്പോഴും കെമിക്കലുകളാണ് അടങ്ങിയിരിയ്ക്കുന്നത്. ഇത് അലര്ജിയുണ്ടാക്കുക മാത്രമല്ല, മുടിയുടെ ആരോഗ്യത്തിനും ദോഷം വരുത്തുന്നു.
താല്ക്കാലിക കറുപ്പ് നല്കുമെങ്കിലും ഇത് പല ദോഷങ്ങളും വരുത്തുമെന്ന് ചുരുക്കം.ഇതിന് പരിഹാരമായി ചെയ്യാവുന്നത് നാച്വറല് വഴികള് പരീക്ഷിയ്ക്കുകയെന്നതാണ്. ഇതിന് സഹായിക്കുന്ന ഒരു ഡൈ വീട്ടില് തന്നെ തയ്യാറാക്കാം. തികച്ചും നാച്വറലായ ചേരുവകള് ഉപയോഗിച്ച് തന്നെ ഇത് തയ്യാറാക്കാന് സാധിയ്ക്കും.
തൈര്
ഇതിനായി വേണ്ടത് മൂന്ന് ചേരുവകളാണ് .തൈര്, കാപ്പിപ്പൊടി, വെളിച്ചെണ്ണ എന്നിവയാണ് ഇവ.റൈബോഫ്ലേവിൻ, കോളിൻ, കാൽസ്യം, ഫോസ്ഫറസ്, പൊട്ടാസ്യം, സോഡിയം, സെലിനിയം, സിങ്ക് തുടങ്ങിയ വിറ്റാമിനുകളും ധാതുക്കളുമെല്ലാം തൈരിൽ അടങ്ങിയിട്ടുണ്ട്. ഉയർന്ന ഗുണങ്ങൾ അടങ്ങിയിട്ടുള്ളതിനാൽ തന്നെ ഈ ഘടകങ്ങളെല്ലാം തലമുടിയെ പരിപോഷിപ്പിക്കുന്നതിൽ വളരെയധികം ഗുണം ചെയ്യും.തലയോട്ടിയിലെ കോശങ്ങളെ ശാന്തമാക്കാൻ സഹായിക്കുന്ന ഒരു കൂളിംഗ് ഏജന്റാണ് തൈര്.
തൈരിലെ ലാക്റ്റിക് ആസിഡും മറ്റ് ഫാറ്റി ആസിഡുകളുമെല്ലാം തലയോട്ടിയെ എല്ലായ്പ്പോഴും ആരോഗ്യകരമാക്കി വയ്ക്കുന്നു, മുടി വളരാന് സഹായിക്കുന്നു. താരൻ തടയുന്നതിന് ആവശ്യകമായ പ്രധാന ആന്റി ഫംഗസ് ഗുണങ്ങൾ തൈരിൽ നിറഞ്ഞിരിക്കുന്നു.തൈരിലെ മോയ്സ്ചറൈസിംഗ് ഗുണങ്ങൾ തലയോട്ടിയിലും മുടിയിഴകളിലും ജലാംശം നൽകാനും അവയുടെ ബലവും തിളക്കവും മെച്ചപ്പെടുത്താനും സഹായിക്കുന്നു.
കാപ്പിപ്പൊടി
കാപ്പിപ്പൊടി പണ്ടു കാലം മുതല് തന്നെ മുടി സംരക്ഷണത്തിന് സഹായിക്കുന്ന ഒന്നാണ്. തലയോട്ടിയിലെ രക്തചംക്രമണം മെച്ചപ്പെടുത്താൻ കാപ്പി സഹായിക്കുന്നു. ഇത് തലയോട്ടിയിൽ നേരിട്ട് പുരട്ടുന്നത് വഴി രക്തചംക്രമണം വർദ്ധിപ്പിക്കുകയും മുടിയുടെ വളർച്ചയെ സഹായിക്കുകയും ചെയ്യുന്നു. നല്ലൊരു ഡൈ ഗുണം മുടിയ്ക്കു നല്കുന്ന ഒന്നു കൂടിയാണിത്. മുടിയുടെ വേരുകള്ക്ക് ബലം നല്കി മുടി വളരാന് സഹായിക്കുന്ന ഒന്ന്.
നല്ല കണ്ടീഷണര് ഗുണം മുടിയ്ക്കു നല്കുന്ന ഒന്നും. ഹെയര് ഫോളിക്കിളുകള് കേടു വരുത്താനുള്ള പ്രധാന കാരണമായ ഡിഎച്ച്ടി പ്രതിരോധിച്ചു കൊണ്ട് ഇത് മുടിയെ ആരോഗ്യ പൂർവ്വം സംരക്ഷിക്കുകയും മുടിയുടെ വളർച്ചയെ സഹായിക്കുകയും മുടിയെ ആരോഗ്യകരമായി നില നിര്ത്തുകയും ചെയ്യുന്നു. മുടി സ്വാഭാവിക രീതിയില് തിളങ്ങാന് സഹായിക്കുന്ന നല്ലൊരു ഹെയര് പായ്ക്കാണിത്.
വെളിച്ചെണ്ണ
നല്ല ശുദ്ധമായ വെളിച്ചെണ്ണ മുടിയ്ക്ക് ഏറെ ഗുണങ്ങള് നല്കുന്ന ഒന്നാണ്. മുടി നര അകറ്റാന് ശുദ്ധമായ വെളിച്ചെണ്ണ തേച്ച് കുളിയ്ക്കുന്നത് ഏറെ നല്ലതാണ്. വരണ്ട മുടിയ്ക്കുള്ള സ്വാഭാവിക കണ്ടീഷണറാണ് വെളിച്ചെണ്ണ.
നല്ലൊരു കണ്ടീഷണര് ഗുണം കൂടി നല്കുന്ന ഒന്നാണ് വെളിച്ചെണ്ണ.ഇതിലെ നല്ല കൊഴുപ്പുകള് മുടിയുടെ ആരോഗ്യത്തിന് ഏറെ ഗുണം നല്കും. മുടിയിൽ ഉണ്ടാകുന്ന പ്രോട്ടീൻ നഷ്ടങ്ങൾ കുറയ്ക്കുകയും മുടിയെ കൂടുതൽ പോഷക പൂർണ്ണവുമാക്കി മാറ്റിയെടുക്കുകയും ചെയ്യുന്നതിൽ ഇതിന് പ്രധാന പങ്കുണ്ട്.
നാച്വറല് ഡൈ പായ്ക്ക്
തൈര് കൊണ്ടുള്ള നാച്വറല് ഡൈ പായ്ക്ക് ഉണ്ടാക്കാന് പഴകിയ, തുരുമ്പുള്ള ഇരുമ്പ് ചീനച്ചട്ടി ഏറെ നല്ലതാണ്. ഇതിലെ ഫെറിക് ഓക്സൈഡ് മുടിയ്ക്ക് ഏറെ നല്ലതാണ്. ഇത് മുടിയിലെ പ്രോട്ടീന് മെലാനിന് പിഗ്മെന്റേഷന് നല്കാന് നല്ലതാണ്. ഈ മെലാനിനാണ് മുടിയ്ക്ക് കറുപ്പ് നല്കുന്നത്. തൈര് മുടിയിലെ കെരാറ്റിന് എന്ന ഘടകത്തെ മൃദുവാക്കാന് സഹായിക്കുന്നു.
4 ടീസ്പൂണ് തൈര്, 3 ടീസ്പൂണ് കാപ്പിപ്പൊടി, 3 ടീസ്പൂണ് വെളിച്ചെണ്ണ എന്നിവ നല്ലതുപോലെ കലക്കി വയ്ക്കുക. ഇത് അര മണിക്കൂര് വയ്ക്കണം. പിന്നീട് ഇത് നരയുളളിടത്ത് പുരട്ടി 1 മണിക്കൂര് കഴിഞ്ഞ് കഴുകാം.ഷാംപൂവോ ഇതുപോലെയുള്ള കെമിക്കലുകളോ ഉപയോഗിയ്ക്കാതെ കഴുകാം. വേണമെങ്കില് താളി പോലെയുള്ള നാച്വറല് വഴികള് പരീക്ഷിയ്ക്കാം. നാച്വറല് ഡൈ ആയത് കൊണ്ടുതന്നെ ഇതിട്ടാലുള്ള കറുപ്പ് 10 ദിവസം വരെയേ നില്ക്കൂ. എന്നാല് ഇത് എത്ര തവണ വേണമെങ്കിലും പുരട്ടാം. ദോഷം വരില്ലെന്ന് മാത്രമല്ല, മുടിയ്ക്കേറെ ഗുണങ്ങള് നല്കുകയും ചെയ്യുന്നു.