വെറും മൂന്ന് ചേരുവകൾ മാത്രം മതി; റവ കേസരി തയ്യാറാക്കാം
വീട്ടിലുള്ള ചേരുവകൾ കൊണ്ടും എളുപ്പവും തയ്യാറാക്കാവുന്ന ഒരു സ്വീറ്റാണ് റവ കേസരി. നല്ല മധുരം കിനിയും കേസരി ഇഷ്ടമില്ലാത്തവരായി ആരുമുണ്ടാകില്ല. വെറും മൂന്നേ മൂന്ന് ചേരുവകള് കൊണ്ട് രുചിയൂറും കേസരി തയ്യാറാക്കുന്നത് എങ്ങനെയെന്ന് നോക്കാം. വായിലിട്ടാൽ അലിഞ്ഞു പോകുന്ന രുചിയിൽ റവ കേസരി തയാറാക്കാം.
ചേരുവകൾ
റവ – ഒരു കപ്പ്
ഏലയ്ക്കാ പൊടിച്ചത് – ഒരു ടീസ്പൂൺ
നെയ്യ് – കാൽ കപ്പ്
പഞ്ചസാര – ഒന്നര കപ്പ്
കശുവണ്ടി, മുന്തിരി – ആവശ്യത്തിന്
തയ്യാറാക്കുന്ന വിധം
പാനിലേക്ക് കാൽക്കപ്പ് നെയ്യ് ഒഴിച്ചു കൊടുക്കുക. അതിലേക്ക് കശുവണ്ടി, മുന്തിരി എന്നിവ ചേർത്ത് നന്നായി ഒന്ന് മൂപ്പിച്ചെടുത്ത് മാറ്റിവയ്ക്കുക.
അതിലേക്ക് ഒരു കപ്പ് റവ ചേർത്ത് ചെറുതായി മൂത്തുവരുമ്പോൾ നന്നായി തിളച്ച വെള്ളം രണ്ട് കപ്പ് ചേർത്ത് ചെറുതീയിൽ ഒന്ന് വേവിച്ചെടുക്കാം.
ഇനി ഇതിലേക്ക് ഒന്നര കപ്പ് പഞ്ചസാര ചേർത്ത് നന്നായി ഇളക്കി കൊടുക്കാം. ഒരു സ്പൂൺ ഏലയ്ക്കാ പൊടിച്ചത് കൂടി ചേർക്കാം. ഇനി ഇതിലേക്ക് വറത്തു വച്ചിരിക്കുന്ന കശുവണ്ടി, മുന്തിരി എന്നിവ കൂടി ചേർത്ത് വിളമ്പാം.