എന്തുകൊണ്ട് സ്ത്രീകൾ തങ്ങളുടെ സ്വകാര്യ ഭാഗങ്ങൾ എപ്പോഴും വൃത്തിയോടെ സൂക്ഷിക്കണം? വിശദമായി മനസിലാക്കാം. സ്വകാര്യഭാഗത്തിന്റെ വൃത്തിയെ കുറിച്ച് പറയുമ്പോൾ ആദ്യം ശ്രദ്ധിക്കേണ്ടത് അടിവസ്ത്രങ്ങളുടെ വൃത്തിയാണ്. നന്നായി കഴുകി വെയിലത്ത് ഉണക്കിയെടുത്ത അടിവസ്ത്രങ്ങളാകണം ഉപയോഗിക്കേണ്ടത്. കൂടാതെ ഓരോ ദിവസവും മാറ്റി ഉപയോഗിക്കാനും ശ്രദ്ധിക്കുക. അല്ലാത്തപക്ഷം അണുബാധ ഉണ്ടാകുന്ന ബാക്റ്റീരിയയുടെ വളർച്ചയ്ക്ക് ഇത് കാരണമായേക്കാം.

രാത്രിയിൽ ധരിക്കുന്ന അടിവസ്ത്രങ്ങൾ പല ആളുകളും അടുത്ത ദിവസം രാവിലെ മാറ്റാറില്ല. രാത്രി ഉറങ്ങുമ്പോൾ യോനിയിൽ നിന്നുമുണ്ടാകുന്ന ഡിസ്ചാർജ് സ്വകാര്യഭാഗത്ത് അസ്വസ്ഥതയുണ്ടാക്കും. ഇത് ഒഴിവാക്കാൻ രാവിലെ അടിവസ്ത്രം മാറി പകരം വൃത്തിയുള്ളത് ധരിക്കുക എന്നതാണ്.

ഓരോ തവണ ലൈംഗികബന്ധത്തിൽ ഏർപ്പെട്ട ശേഷവും സ്വകാര്യഭാഗം വൃത്തിയാക്കണം. കാരണം സ്രവങ്ങൾ വൃത്തിയാക്കാതെ ദീർഘനേരം തുടരുന്നത് പല അസ്വസ്ഥതകൾക്കും UTI പോലുള്ള ആരോഗ്യ പ്രശ്‌നങ്ങൾക്കും കാരണമാകും. അതുകൊണ്ട് പരസ്പര ബന്ധത്തിന് ശേഷം കുളിക്കുകയോ അല്ലെങ്കിൽ കുറഞ്ഞത് സ്വകാര്യ ഭാഗം വൃത്തിയാക്കുകയെങ്കിലും ചെയ്യേണ്ടതുണ്ട്.

സ്വകാര്യ ഭാഗം വൃത്തിയാക്കാൻ പലരും സോപ്പ് ഉപയോഗിക്കാറുണ്ട്. കാലം മാറിയതോടെ ഇന്റിമേറ്റ് വാഷ് എന്ന ലേബലിൽ പല ഉൽപ്പന്നങ്ങളും വിപണിയിലെത്തി. എന്നാൽ ഇത്തരം ഉൽപ്പന്നങ്ങളുടെ ഉപയോഗം യോനീ ഭാഗത്തെ സ്വാഭാവിക പിഎച്ച് ബാലൻസിനെ തടസ്സപ്പെടുത്തുകയും നല്ല ബാക്ടീരിയകളെ നശിപ്പിക്കുകയും ചെയ്യും. ചെറുചൂടുവെള്ളം ഉപയോഗിച്ച് കഴുകുകയാണ് ഏറ്റവും നല്ല മാർഗ്ഗം.

സ്വകാര്യ ഭാഗത്ത് ഉപയോഗിക്കാവുന്ന പല നിറത്തിലും പല മണത്തിലുമുള്ള ഉൽപ്പന്നങ്ങൾ ഇന്ന് ലഭ്യമാണ്. പൂക്കളുടെയും മറ്റും സുഗന്ധമുള്ള സാനിറ്ററി പാഡുകളൊക്കെ നിലവിലുണ്ട്. നല്ല മണം ഉള്ളതിനാൽ തന്നെ ഇനി സ്വകാര്യഭാഗത്ത് ദുർഗന്ധമുണ്ടെങ്കിൽ അത് ഒഴിവാക്കാൻ ഇവ സഹായിക്കുമെന്ന് കരുതി വാങ്ങി ഉപയോഗിക്കുന്നവർ കുറവല്ല. എന്നാൽ ഇത്തരം മണം നൽകാൻ ചേർക്കുന്ന വസ്തുക്കൾ ചർമ്മത്തിന് കേടുപാട് ഉണ്ടാക്കുമെന്ന് അറിയുക. ചുരുക്കം ചില ഉപയോഗത്തിൽ പ്രശ്‌നം ഒന്നും ഉണ്ടാകില്ലെങ്കിലും ദീർഘകാല ഉപയോഗത്തിൽ ചർമ്മത്തെ ദോഷകരമായി ബാധിക്കും. സ്വകാര്യഭാഗത്ത് ദുർഗന്ധം ഉണ്ടെങ്കിൽ ഉടൻ തന്നെ ഒരു ഡോക്ടറെ സമീപിക്കുക.

ഇന്ന് മിക്ക ബാത്‌റൂമുകളിലും ടോയ്ലെറ്റിന്റെ പൈപ്പിനോട് ചേർത്ത് ഒരു ജെറ്റ് സ്‌പ്രേ കൂടെ ഘടിപ്പിക്കാറുണ്ട്. സ്വകാര്യ ഭാഗം പെട്ടന്ന് വൃത്തിയാക്കാൻ ഇതാണ് സൗകര്യവും. എന്നാൽ ഇതിൽ നിന്ന് ശക്തിയോടെ പുറപ്പെടുന്ന വെള്ളം ചർമ്മത്തിന് ദോഷം വരുത്തും. വളരെ മൃദുവായി വേണം ഈ ഭാഗത്തെ ചർമ്മത്തെ കൈകാര്യം ചെയ്യാൻ.

ആർത്തവ ദിനങ്ങളിൽ ഉപയോഗിക്കുന്ന പാഡ്, റ്റാംപോൺ എന്നിവയൊക്കെ കൃത്യ സമയത്ത് മാറ്റുക. മെൻസ്ട്രൽ കപ്പ് വൃത്തിയാക്കി സൂക്ഷിക്കുക. ആർത്തവ ശുചിത്വത്തിന്റെ ഭാഗം കൂടിയാണിത്. ഒരേ പാഡ് ഏഴും എട്ടും പത്തും മണിക്കൂറുകൾ ഉപയോഗിക്കുന്നവർ ഗുരുതരമായ ആരോഗ്യപ്രശ്‌നങ്ങളെയാണ് ക്ഷണിച്ച് വരുത്തുന്നത്.