നേപ്പാളിലെ റോൽപയിൽ വിനോദസഞ്ചാരികൾ സഞ്ചരിച്ച ജീപ്പ് 700 മീറ്റർ താഴ്ചയുള്ള കൊക്കയിലേക്ക് മറിഞ്ഞ് 17 പേർ മരിച്ചു. തവാങ് റൂറലിലെ ജൽജാല മേഖലയിൽ വ്യാഴാഴ്ച ഉച്ചതിരിഞ്ഞായിരുന്നു ദാരുണമായ ഈ അപകടം നടന്നത്. വൈശാഖ പൂർണിമ ഉത്സവത്തിൽ പങ്കെടുക്കാൻ വാടകയ്ക്കെടുത്ത ജീപ്പിൽ യാത്ര ചെയ്തവരാണ് അപകടത്തിൽപ്പെട്ടത്.

റുകും ഈസ്റ്റിൽ നിന്ന് ജൽജാലയിലേക്ക് പോവുകയായിരുന്നു തീർത്ഥാടക സംഘം. കനത്ത മഴയെത്തുടർന്ന് മലയോര പാതയിലെ വഴുക്കലിൽ നിയന്ത്രണം വിട്ട ജീപ്പ് താഴേക്ക് മറിയുകയായിരുന്നുവെന്നാണ് പ്രാഥമിക നിഗമനം. അപകടത്തിൽപ്പെട്ട എല്ലാവരും സംഭവസ്ഥലത്തുവച്ചുതന്നെ മരണപ്പെട്ടു.

പ്രദേശത്ത് തുടരുന്ന കനത്ത മഴയും മോശം കാലാവസ്ഥയും കാരണം രക്ഷാപ്രവർത്തനം അതീവ ദുഷ്കരമാണെന്ന് ജില്ലാ പോലീസ് അറിയിച്ചു. അപകടസമയത്ത് വാഹനത്തിൽ കൃത്യമായി എത്ര പേരുണ്ടായിരുന്നു എന്ന കാര്യത്തിൽ വ്യക്തത വന്നിട്ടില്ലെന്ന് ഇൻസ്പെക്ടർ സുനിൽ ഥാപ്പ വ്യക്തമാക്കി. ഉത്സവ സീസണായതിനാൽ നേപ്പാളിലെ മലയോര മേഖലകളിൽ വലിയ യാത്രാത്തിരക്കാണ് അനുഭവപ്പെടുന്നത്.