മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ സി.ജെ.പി ഡൽഹിയിൽ പ്രഖ്യാപിച്ച പ്രതിഷേധങ്ങളെ തുടർന്ന് നിർത്തിവെച്ചിരുന്ന മുഴുവൻ ട്രെയിൻ സർവീസുകളും സാധാരണ ഷെഡ്യൂൾ അനുസരിച്ച് പുനരാരംഭിച്ചതായി നോർത്തേൺ റെയിൽവേ അറിയിച്ചു. ഒക്ടോബർ 10-ന് പുലർച്ചെ നാല് മണിക്കും ഉച്ചയ്ക്ക് രണ്ട് മണിക്കും ഇടയിൽ ന്യൂഡൽഹി, ഹസ്രത്ത് നിസാമുദ്ദീൻ റെയിൽവേ സ്റ്റേഷനുകളിൽ എത്തിച്ചേരേണ്ടിയിരുന്ന മെയിൽ, എക്സ്പ്രസ് ട്രെയിനുകളാണ് സുരക്ഷ മുൻനിർത്തി താൽക്കാലികമായി റദ്ദാക്കിയിരുന്നത്.

ഒക്ടോബർ ഒൻപതിന് ഉച്ചകഴിഞ്ഞ് ശേഷം പുറപ്പെടേണ്ടിയിരുന്നതും നിശ്ചിത സമയത്തിനുള്ളിൽ ഡൽഹി സ്റ്റേഷനുകളിൽ എത്തേണ്ടതുമായ ട്രെയിനുകൾക്കാണ് നിയന്ത്രണം ബാധകമായിരുന്നത്. ഇൻഡോറിനും ഡൽഹിക്കുമിടയിലുള്ള ട്രെയിനുകളും മുംബൈ-നിസാമുദ്ദീൻ രാജധാനി എക്സ്പ്രസും (22221) റദ്ദാക്കിയവയിൽ ഉൾപ്പെടുന്നു. രാജധാനി, ആഗസ്റ്റ് ക്രാന്തി എക്സ്പ്രസ് തുടങ്ങിയ പ്രധാന സർവീസുകൾ അഞ്ച് മണിക്കൂറോളം വൈകിയാണ് ഓടിയത്. നിലവിൽ സ്ഥിതിഗതികൾ ശാന്തമായതിനെത്തുടർന്ന് സർവീസുകൾ പൂർണ്ണമായും പഴയ പടിയായിട്ടുണ്ടെന്ന് റെയിൽവേ അധികൃതർ വ്യക്തമാക്കി.