ഇന്ത്യയിൽ അശാന്തിയും സംഘർഷവും സൃഷ്ടിക്കാൻ കോക്രോച്ച് ജനതാ പാർട്ടി (സിജെപി) വിദേശ സംഘടനകളിൽ നിന്നും ഇന്ത്യാവിരുദ്ധ ശക്തികളിൽ നിന്നും അനധികൃതമായി പണം സ്വീകരിച്ചെന്ന ആരോപണവുമായി കേന്ദ്ര സർക്കാർ. സിജെപി സ്ഥാപകൻ അഭിജീത് ദിപ്‌കെ, സഹകൺവീനർ അശുതോഷ് റങ്ക എന്നിവർക്കെതിരെയാണ് കേന്ദ്രമന്ത്രി ജിതേന്ദ്ര സിങ് ആരോപണം ഉന്നയിച്ചത്.

അമേരിക്ക ആസ്ഥാനമായുള്ള സംഭാവനദാതാക്കളിൽ നിന്ന് അഭിജീത് ദിപ്‌കെ പണം സ്വീകരിച്ചെന്നും പാക്കിസ്ഥാൻ രാഷ്ട്രീയ നേതാക്കൾ അശുതോഷ് റങ്കയ്ക്ക് സാമ്പത്തിക സഹായം നൽകിയെന്നുമാണ് മന്ത്രിയുടെ ആരോപണം. ഇന്ത്യയ്ക്കകത്തും പുറത്തുമുള്ള ഇന്ത്യാവിരുദ്ധ സംഘടനകളും എൻജിഒകളും ഇതിന് പിന്നിലുണ്ടെന്നും അദ്ദേഹം ബെംഗളൂരുവിൽ മാധ്യമങ്ങളോട് പറഞ്ഞു.

ഡൽഹിയിൽ ഉത്സവകാലത്ത് സംഘർഷവും അരാജകത്വവും സൃഷ്ടിക്കാനാണ് സിജെപി പ്രതിഷേധങ്ങളിലൂടെ ശ്രമിച്ചതെന്ന് ബിജെപി വക്താവ് തുഹിൻ എ. സിൻഹയും ആരോപിച്ചു. രാജ്യത്തെ ജനാധിപത്യ സ്ഥാപനങ്ങളുടെ വിശ്വാസ്യത തകർക്കാനുള്ള ആസൂത്രിത നീക്കമാണ് പ്രതിഷേധങ്ങളെന്നും അദ്ദേഹം പറഞ്ഞു.

അതേസമയം, സിജെപി നേതാക്കളായ സൗരവ് ദാസിനെയും അശുതോഷ് റങ്കയെയും ചോദ്യം ചെയ്യാൻ ഡൽഹി പൊലീസ് ക്രൈംബ്രാഞ്ച് വിളിപ്പിച്ചതിന് പിന്നാലെയാണ് ആരോപണങ്ങൾ ഉയർന്നത്. നിരോധനാജ്ഞ ലംഘിക്കൽ, അനുമതിയില്ലാതെ ജന്തർ മന്തറിൽ പ്രവേശിക്കൽ, മറ്റൊരു രാഷ്ട്രീയ പാർട്ടിയുടെ സ്ഥലത്ത് അതിക്രമിച്ചുകയറൽ തുടങ്ങിയ സംഭവങ്ങളാണ് പൊലീസ് അന്വേഷിക്കുന്നത്.

ഒക്ടോബർ 10ന് ഇരുവരെയും പൊലീസ് കസ്റ്റഡിയിലെടുത്തിരുന്നു. പിന്നീട് 50,000 രൂപ വീതമുള്ള സമാധാന ബോണ്ട് ഒപ്പിട്ട ശേഷമാണ് വിട്ടയച്ചത്. ഒരു വർഷത്തേക്ക് സമാധാനലംഘന പ്രവർത്തനങ്ങളിൽ ഏർപ്പെടില്ലെന്നും ഇവർ ഉറപ്പുനൽകിയിരുന്നു. എന്നാൽ ഒക്ടോബർ 13ന് പൊലീസ് ബാരിക്കേഡുകൾ മറികടന്ന് ജന്തർ മന്തറിലെത്തി മുഖ്യ തെരഞ്ഞെടുപ്പ് കമ്മിഷണർക്കെതിരെ മുദ്രാവാക്യം വിളിച്ചതോടെ വീണ്ടും കേസെടുത്തു.

എന്നാൽ സിജെപിക്കെതിരായ വിദേശ ഫണ്ടിങ് ആരോപണങ്ങൾ പ്രതിപക്ഷം തള്ളി. തെളിവുകളില്ലാതെയാണ് ബിജെപി നേതാക്കൾ ആരോപണങ്ങൾ ഉന്നയിക്കുന്നതെന്ന് കർണാടക ആഭ്യന്തരമന്ത്രി പ്രിയങ്ക് ഖാർഗെ വിമർശിച്ചു. കേന്ദ്ര ആഭ്യന്തരമന്ത്രി അമിത് ഷാ, വിദേശകാര്യ മന്ത്രി എസ്. ജയശങ്കർ, രഹസ്യാന്വേഷണ ഏജൻസികളായ ഐബി, റോ എന്നിവയുടെ പ്രവർത്തനക്ഷമതയെയും അദ്ദേഹം ചോദ്യം ചെയ്തു.