നാല് സംസ്ഥാനങ്ങളും രണ്ട് കേന്ദ്രഭരണ പ്രദേശങ്ങളും അടക്കം ആറിടങ്ങളിൽ വോട്ടർപട്ടികയുടെ പ്രത്യേക സംക്ഷിപ്ത പരിഷ്‌കരണത്തിന് (SSR) കേന്ദ്ര തെരഞ്ഞെടുപ്പ് കമ്മീഷൻ ഉത്തരവ് പുറപ്പെടുവിച്ചു. അരുണാചൽ പ്രദേശ്, മിസോറാം, ഒഡീഷ, സിക്കിം എന്നീ സംസ്ഥാനങ്ങളിലും ചണ്ഡീഗഡ്, ദാദ്ര ആന്റ് നഗർ ഹവേലി - ദാമൻ ദിയു എന്നീ കേന്ദ്രഭരണ പ്രദേശങ്ങളിലുമാണ് കമ്മീഷൻ പരിഷ്‌കരണം പ്രഖ്യാപിച്ചത്. 2027 ജനുവരി 21-നാണ് അന്തിമ വോട്ടർപട്ടിക പ്രസിദ്ധീകരിക്കുക.

കരട് വോട്ടർപട്ടിക നവംബർ 30-ന് പ്രസിദ്ധീകരിക്കും. തുടർന്ന് ഡിസംബർ 30 വരെ പരാതികളും ആക്ഷേപങ്ങളും സമർപ്പിക്കാം. അർഹരായ പുതിയ വോട്ടർമാരെ ഉൾപ്പെടുത്താനും അനർഹരായവരെ നീക്കം ചെയ്യാനുമാണ് ഈ നടപടി. ഈ പ്രദേശങ്ങളിൽ വോട്ടർപട്ടികയുടെ പ്രത്യേക തീവ്ര പരിഷ്‌കരണം (SIR) നേരത്തെ പൂർത്തിയായിരുന്നു.

പുതിയ സംസ്ഥാനങ്ങൾ കൂടി ഉൾപ്പെടുത്തിയതോടെ ആകെ എസ്.എസ്.ആർ നടക്കുന്ന സംസ്ഥാനങ്ങളുടെയും കേന്ദ്രഭരണ പ്രദേശങ്ങളുടെയും എണ്ണം 23 ആയി ഉയർന്നു. 2027 ജനുവരി ഒന്ന് യോഗ്യതാ തീയതിയായി കണക്കാക്കിയാണ് വോട്ടർപട്ടിക പുതുക്കുന്നത്.