ദ്രാവിഡ രാഷ്ട്രീയത്തിന്റെ കോട്ടയായ തമിഴ്‌നാട്ടിൽ അഞ്ച് പതിറ്റാണ്ടിലേറെ നീണ്ട ഇടവേളയ്ക്ക് ശേഷം കോൺഗ്രസ് വീണ്ടും ഭരണത്തിലേക്ക്. നടൻ വിജയ്‌യുടെ നേതൃത്വത്തിലുള്ള പുതിയ മന്ത്രിസഭയിൽ രണ്ട് കോൺഗ്രസ് പ്രതിനിധികൾ വ്യാഴാഴ്ച സത്യപ്രതിജ്ഞ ചെയ്ത് അധികാരമേൽക്കും. കോൺഗ്രസ് എംഎൽഎമാരായ അഡ്വ. രാജേഷ് കുമാർ, പി. വിശ്വനാഥ് എന്നിവരാണ് മന്ത്രിമാരാകുന്നത്. എഐസിസി പ്രസിഡന്റ് മല്ലികാർജുൻ ഖാർഗെ ഇതിന് അംഗീകാരം നൽകിയതായി പാർട്ടി സംഘടന ജനറൽ സെക്രട്ടറി കെ.സി. വേണുഗോപാൽ എക്‌സ് പ്ലാറ്റ്‌ഫോമിലൂടെ അറിയിച്ചു.

"ഇതൊരു ചരിത്ര നിമിഷമാണ്. 59 വർഷത്തെ നീണ്ട ഇടവേളയ്ക്ക് ശേഷമാണ് കോൺഗ്രസ് തമിഴ്നാട് മന്ത്രിസഭയുടെ ഭാഗമാകുന്നത്. രാഹുൽ ഗാന്ധിയുടെ ജനക്ഷേമ നയങ്ങളും കാഴ്ചപ്പാടുകളും തമിഴ്നാട്ടിൽ നടപ്പിലാക്കാൻ പുതിയ മന്ത്രിമാർക്ക് സാധിക്കുമെന്ന് ഉറപ്പുണ്ട്." — കെ.സി. വേണുഗോപാൽ

ഡിഎംകെ നേതൃത്വം നൽകുന്ന 'സെക്യുലർ പ്രോഗ്രസീവ് അലയൻസിന്റെ' ഭാഗമായാണ് കോൺഗ്രസ് ഇത്തവണ തിരഞ്ഞെടുപ്പിനെ നേരിട്ടത്. എന്നാൽ, ഫലം വന്നപ്പോൾ നടൻ വിജയ്‌യുടെ ടിവികെ (TVK) പാർട്ടിക്ക് കേവല ഭൂരിപക്ഷം ലഭിക്കാതെ വന്നതോടെ കോൺഗ്രസ് അപ്രതീക്ഷിത നീക്കം നടത്തുകയായിരുന്നു. തിരഞ്ഞെടുപ്പിൽ 5 സീറ്റുകൾ നേടിയ കോൺഗ്രസ്, വിജയ്‌യുടെ സർക്കാരിന് പിന്തുണ പ്രഖ്യാപിച്ച് മന്ത്രിസഭയിൽ പങ്കാളികളാകാൻ തീരുമാനിച്ചു. നിലവിൽ ഡിഎംകെ സഖ്യത്തിലുള്ള ഇടതുപക്ഷ പാർട്ടികളും വിജയ് സർക്കാരിന് പുറത്തുനിന്ന് പിന്തുണ നൽകുന്നുണ്ട്.