പ്രധാനമന്ത്രി നരേന്ദ്ര മോദിയുടെ ആലിംഗന നയതന്ത്രത്തെയും വിദേശനയത്തെയും അധിക്ഷേപിച്ച ലോക്‌സഭ പ്രതിപക്ഷ നേതാവ് രാഹുൽ ഗാന്ധിയുടെ പരാമർശം അപലപനീയമാണെന്ന് കേന്ദ്ര പ്രതിരോധമന്ത്രി രാജ്‌നാഥ് സിങ്. രാഹുലിന്റെ നടപടി പ്രതിപക്ഷ നേതാവ് എന്ന പദവിക്ക് നിരക്കാത്തതാണെന്നും ഇന്ത്യയുടെ അന്താരാഷ്ട്ര യശസ്സിനെയും വിദേശബന്ധങ്ങളെയുമാണ് അദ്ദേഹം ആക്ഷേപിച്ചതെന്നും രാജ്‌നാഥ് സിങ് കുറ്റപ്പെടുത്തി.

"പ്രധാനമന്ത്രിയെയും ഇന്ത്യയുടെ വിദേശനയത്തെയും കുറിച്ചുള്ള രാഹുൽ ഗാന്ധിയുടെ വാക്കുകൾ അത്യന്തം നിന്ദ്യമാണ്. ഒരു പ്രതിപക്ഷ നേതാവിൽ നിന്ന് ഇത്തരമൊരു മോശം പെരുമാറ്റം പ്രതീക്ഷിക്കാനാകില്ല. ഗാന്ധി എന്ന കുടുംബപ്പേരുള്ള ഒരാൾക്ക് ഇത്രയും ലജ്ജാകരമായ പരാമർശം നടത്താൻ കഴിയുമെന്ന് സങ്കൽപ്പിക്കാൻ പോലുമാകില്ല" എന്ന് അദ്ദേഹം വ്യക്തമാക്കി.

വിവാദത്തിന് ആസ്പദമായ സംഭവം

വ്യാഴാഴ്ച നടന്ന രച്നാത്മക് കോൺഗ്രസ് ദേശീയ കൺവെൻഷനിൽ സംസാരിക്കവെയായിരുന്നു സംഭവം. വിദേശ രാഷ്ട്രത്തലവന്മാരെ കെട്ടിപ്പിടിക്കുന്ന പ്രധാനമന്ത്രിയുടെ ശൈലിയെ പരിഹസിച്ച രാഹുൽ, വേദിയിൽ കോൺഗ്രസ് നേതാവ് സന്ദീപ് ദീക്ഷിതിനെ ആലിംഗനം ചെയ്തു. "പ്രധാനമന്ത്രിക്ക് ഈ ആശയം എവിടെ നിന്നാണ് ലഭിച്ചതെന്ന് അറിയില്ല, ഇതാണ് വിദേശനയമെന്നാണ് അദ്ദേഹത്തിന്റെ വിചാരം" എന്ന് രാഹുൽ പറഞ്ഞു. തുടർന്ന് 'ഞാൻ മെലോണി ആണെന്ന് കരുതിയാണോ കെട്ടിപ്പിടിച്ചതെന്ന്' സന്ദീപ് ദീക്ഷിത് ചോദിച്ചപ്പോൾ 'താന് ഇതുവരെ ആ ഘട്ടത്തിൽ എത്തിയില്ലെ'ന്നായിരുന്നു രാഹുലിന്റെ മറുപടി.

രാഹുലിന്റെ പരാമർശം രാഷ്ട്രീയ മാന്യതയ്ക്ക് നിരക്കാത്തതാണെന്ന് ബി.ജെ.പി വിമർശിച്ചു. എന്നാൽ രാഹുൽ ഗാന്ധി ഇറ്റാലിയൻ പ്രധാനമന്ത്രി ജോർജിയ മെലോണിയുടെ പേര് പരാമർശിച്ചിട്ടേയില്ലെന്നും ആരോപണങ്ങൾ അടിസ്ഥാനരഹിതമാണെന്നും കോൺഗ്രസ് വക്താവ് ഷമ മുഹമ്മദ് വ്യക്തമാക്കിക്കൊണ്ട് പ്രതിരോധിച്ചു.