ഭാര്യ മുഴുവൻ സമയം ഫോണിൽ, വീട്ടുജോലി തീരുന്നില്ല വിവാഹമോചനം ആവശ്യപ്പെട്ട് കോടതിയിലെത്തി യുവാവ്. വിവാഹം കഴിഞ്ഞ് 13ാം വർഷമാണ് മുംബൈ സ്വദേശിയായ 35കാരൻ കോടതിയിൽ വിവാഹ മോചന ഹർജിയുമായി എത്തിയത്. 2018ൽ കുടുംബ കോടതി വിവാഹ മോചന ഹർജി തള്ളിയതിനെതിരെയാണ് യുവാവ് മുംബൈ ഹൈക്കോടതിയെ സമീപിച്ചത്. ഭാര്യ ദിവസത്തിന്റെ ഏറിയ പങ്കും ഭാര്യയുടെ അമ്മയുമായി ഫോണിൽ സമയം കളയുകയാണെന്നും അതിനാൽ വീട്ട് ജോലികൾ തീരാറില്ല. 

മിക്ക ദിവസവും ഭക്ഷണം പോലും കഴിക്കാതെ ജോലിക്ക് പോവേണ്ട സ്ഥിതി നേരിടേണ്ടി വരുന്നുവെന്നും കാണിച്ചായിരുന്നു യുവാവിന്റെ പരാതി. 
വിവാഹ ബന്ധത്തിലെ ക്രൂരതയെന്ന വിശേഷണത്തോടെയായിരുന്നു യുവാവിന്റെ ഹർജി. എന്നാൽ ഓഫീസ് ജോലി കഴിഞ്ഞ് വന്ന ശേഷം വീട്ടുജോലി തനിയെ ആണ് ചെയ്യേണ്ടി വരുന്നതെന്നും പരാതിപ്പെട്ടപ്പോൾ ഭർതൃവീട്ടുകാരും ഭർത്താവും പീഡിപ്പിച്ചെന്നുമാണ് യുവാവിന്റെ ഭാര്യ കോടതിയെ അറിയിച്ചത്. നിരവധി അവസരങ്ങളിൽ ഭർത്താവ് ഉപദ്രവിച്ചെന്നും യുവതി കോടതിയെ ബോധിപ്പിക്കുകയായിരുന്നു. ഇതിന് പിന്നാലെ രൂക്ഷ വിമർശനമാണ് യുവാവിന്റെ പരാതിക്ക് മുംബൈ ഹൈക്കോടതിയിൽ നിന്ന് നേരിടേണ്ടി വന്നത്.

വീട്ടുജോലി ഭാര്യ തന്നെ ചെയ്യണമെന്ന് നിർബന്ധം പിടിക്കുന്നതും ചിന്തിക്കുന്നതും ഇടുങ്ങിയ പിന്തിരിപ്പൻ മനോഭാവം മൂലമാണെന്ന് കോടതി വ്യക്തമാക്കി. ഭാര്യയും ഭർത്താവും സമഭാവനയോടെ വീട്ടിലെ ജോലികൾ ചെയ്യണമെന്നും കോടതി നിരീക്ഷിച്ചു. പ്രാകൃതമായ മനോഭാവമാണ് വീട്ട് ജോലികൾ സ്ത്രീകളുടേത് മാത്രമാണെന്ന് വാദിക്കുന്നത്. വിവാഹം കഴിച്ചു എന്നത് കൊണ്ട് ഭാര്യയുടെ മാതാപിതാക്കളുമായുള്ള ബന്ധം ഉപേക്ഷികണം എന്നില്ലെന്നും കോടതി വ്യക്തമാക്കി. ഭാര്യ, വീട്ടുകാരുമായി സംസാരിക്കുന്നതിന് അനാവശ്യമായി കാണരുതെന്നും വീട്ടുകാരുമായുള്ള ബന്ധം അറുക്കാൻ ശ്രമിക്കുന്നത് യുവതിക്ക് മാനസിക വൃഥയ്ക്ക് കാരണമാകുമെന്നും കോടതി വ്യക്തമാക്കി.

മാതാപിതാക്കളുമായുള്ള എല്ലാ ബന്ധങ്ങളും ഉപേക്ഷിച്ച് ഭർത്താവിനൊപ്പം പോകണമെന്ന് പങ്കാളിയിൽ നിന്ന് പ്രതീക്ഷിക്കരുതെന്നും യുവാവിനെ കോടതി ഉപദേശിച്ചു. രൂക്ഷ വിമർശനങ്ങൾക്ക് പിന്നാലെ യുവാവിന്റെ ഹർജി കോടതി തള്ളുകയായിരുന്നു.