തലസ്ഥാനത്തെ വായുമലിനീകരണം പിടിച്ചുനിർത്താൻ വിപ്ലവകരമായ നീക്കവുമായി ഡൽഹി സർക്കാർ. വാഹനങ്ങൾക്ക് സാധുവായ മലിനീകരണ നിയന്ത്രണ സർട്ടിഫിക്കറ്റ് (PUC) ഇല്ലെങ്കിൽ പെട്രോൾ പമ്പുകളിൽ നിന്ന് ഇന്ധനം നൽകില്ലെന്ന നിയമം സർക്കാർ സ്ഥിരപ്പെടുത്തി. വായുനിലവാരം മെച്ചപ്പെടുത്തുന്നതിന്റെ ഭാഗമായി മുൻപ് നിർദ്ദേശമായി വന്നിരുന്ന ഈ നീക്കം ഇനി മുതൽ ദീർഘകാലാടിസ്ഥാനത്തിൽ കർശനമായി നടപ്പാക്കാനാണ് തീരുമാനം.

പെട്രോൾ പമ്പുകളിൽ ഇന്ധനം നിറയ്ക്കാനെത്തുന്ന വാഹനങ്ങളുടെ പുക പരിശോധനാ സർട്ടിഫിക്കറ്റ് ഡിജിറ്റലായി പരിശോധിക്കാനുള്ള സംവിധാനം ഉടൻ സജ്ജമാകും. കേന്ദ്ര സർക്കാരിന്റെ 'വാഹൻ' ഡാറ്റാബേസുമായി ബന്ധിപ്പിച്ചാണ് പരിശോധന നടക്കുക. സർട്ടിഫിക്കറ്റ് ഇല്ലാത്തവർക്കോ കാലാവധി കഴിഞ്ഞവർക്കോ ഇന്ധനം നൽകരുതെന്ന് പമ്പുടമകൾക്ക് സർക്കാർ കർശന നിർദ്ദേശം നൽകി. ഇതോടെ പരിശോധന സർട്ടിഫിക്കറ്റ് പുതുക്കുന്നതുവരെ വാഹന ഉടമകൾക്ക് ഇന്ധനം ലഭിക്കില്ല.

വാഹനങ്ങൾ പുറന്തള്ളുന്ന പുകയാണ് ഡൽഹിയിലെ മലിനീകരണത്തിന്റെ പ്രധാന ഉറവിടങ്ങളിലൊന്ന്. കാലപ്പഴക്കം ചെന്നതും ശരിയായ രീതിയിൽ അറ്റകുറ്റപ്പണി നടത്താത്തതുമായ വാഹനങ്ങളെ നിരത്തിൽ നിന്ന് നിയന്ത്രിക്കാൻ ഈ പുതിയ നിയമം സഹായിക്കും. സ്വകാര്യ കാറുകൾ, ഇരുചക്ര വാഹനങ്ങൾ തുടങ്ങി എല്ലാത്തരം വാഹനങ്ങൾക്കും ഈ നിർദ്ദേശം ബാധകമാണ്. ഇന്ധനം നിഷേധിക്കുന്ന നടപടിയിലൂടെ വാഹന ഉടമകൾ കൃത്യസമയത്ത് പുക പരിശോധന നടത്താൻ നിർബന്ധിതരാകുമെന്നാണ് ഉദ്യോഗസ്ഥർ പ്രതീക്ഷിക്കുന്നത്.