കർണാടകയുടെ വിഖ്യാതമായ മൈസൂരു ദസറ ജംബൂസവാരിയിൽ ചരിത്രത്തിലാദ്യമായി കേരളത്തിന്റെ നിശ്ചലദൃശ്യം അവതരിപ്പിച്ചു. സംസ്ഥാനത്തിന്റെ സമ്പന്നമായ സാംസ്കാരിക പൈതൃകം, തനതായ കലാരൂപങ്ങൾ, പ്രകൃതിസൗന്ദര്യം എന്നിവ വിളിച്ചോതിയ അവതരണം ഘോഷയാത്രയിലെ പ്രധാന ആകർഷണമായി മാറി. കർണാടക സർക്കാരിന്റെ പ്രത്യേക ക്ഷണപ്രകാരം നടന്ന ചടങ്ങിൽ കേരള മുഖ്യമന്ത്രി വി.ഡി. സതീശൻ വിശിഷ്ടാതിഥിയായി പങ്കെടുത്തു. ഒക്ടോബർ 21-ന് മൈസൂരു കൊട്ടാരത്തിൽ നിന്ന് ആരംഭിച്ച ഘോഷയാത്രയിൽ 53 നിശ്ചലദൃശ്യങ്ങളും 50 കലാരൂപങ്ങളുമാണ് അണിനിരന്നത്.

സാംസ്കാരിക വകുപ്പിന്റെ ഏകോപനത്തിൽ ഒരുങ്ങിയ നിശ്ചലദൃശ്യത്തിൽ കേരളത്തിന്റെ അനുഷ്ഠാനകലയായ തെയ്യവും ശാസ്ത്രീയ കലാരൂപമായ കഥകളിയുമായിരുന്നു പ്രധാന ആകർഷണങ്ങൾ. ഒപ്പം സംസ്ഥാനത്തിന്റെ ആഗോള സാംസ്കാരിക സ്വത്വത്തെ പ്രതിനിധീകരിക്കുന്ന പ്രകാശപൂരിതമായ ഭൂഗോളവും പ്രകൃതിഭംഗി വിളിച്ചോതുന്ന തെങ്ങുകളും ഹരിതാഭമായ ദൃശ്യങ്ങളും ഉൾപ്പെടുത്തിയിരുന്നു. ചുവർചിത്ര ശൈലിയിലുള്ള വള്ളത്തിന്റെ മാതൃകയും അകമ്പടിയായെത്തിയ ചെണ്ടമേളവും കാണികളെ ഏറെ ആകർഷിച്ചു.

ഐ.എ.എസ്. ഉദ്യോഗസ്ഥൻ രത്തൻ യു. കേൽക്കർ, സാംസ്കാരിക വകുപ്പ് ഡെപ്യൂട്ടി ഡയറക്ടർ നിഷ ആന്റണി എന്നിവരുടെ നേതൃത്വത്തിലാണ് പദ്ധതിയുടെ ഏകോപനം നിർവഹിച്ചത്. ദേശീയ-അന്തർദേശീയ ശ്രദ്ധയാകർഷിക്കുന്ന മൈസൂരു ദസറ വേദിയിലെ ഈ പങ്കാളിത്തം കേരളത്തിന്റെ വിനോദസഞ്ചാര സാധ്യതകൾക്കും കലാ-സാംസ്കാരിക പൈതൃകത്തിന്റെ പ്രചാരണത്തിനും വലിയ കരുത്തായി. അയൽസംസ്ഥാനങ്ങളായ കേരളവും കർണാടകയും തമ്മിലുള്ള സാംസ്കാരിക സഹകരണം കൂടുതൽ ശക്തിപ്പെടുത്താനും ഈ ചരിത്രനേട്ടം വഴിയൊരുക്കി.