മഹാരാഷ്ട്രയിൽ വിവാദമായ മതപരിവർത്തന നിരോധന ബില്ലിന് സംസ്ഥാന മന്ത്രിസഭാ യോഗം അംഗീകാരം നൽകി. നിർബന്ധിത മതപരിവർത്തനം തടയുന്നതിനുള്ള കർശന വ്യവസ്ഥകൾ ഉൾപ്പെടുത്തിയ ബിൽ വരാനിരിക്കുന്ന നിയമസഭാ സമ്മേളനത്തിൽ അവതരിപ്പിക്കും. സംസ്ഥാനത്ത് ദീർഘകാലമായി ഉയരുന്ന ആവശ്യമാണിതെന്ന് മന്ത്രി നിതേഷ് റാണെ വ്യക്തമാക്കി.

പുതിയ നിയമപ്രകാരം ഒരാളെ നിർബന്ധിച്ചോ പ്രലോഭനങ്ങളിലൂടെയോ മതംമാറ്റുന്നത് ജാമ്യമില്ലാ കുറ്റമായി (Non-Bailable Offence) കണക്കാക്കും. മധ്യപ്രദേശ്, ഗുജറാത്ത് എന്നിവിടങ്ങളിലെ സമാനമായ നിയമങ്ങളെക്കാൾ കൂടുതൽ ഫലപ്രദവും കർക്കശവുമാകും മഹാരാഷ്ട്രയിലെ നിയമമെന്നും അദ്ദേഹം അവകാശപ്പെട്ടു. ഹിന്ദു സംഘടനകളും സാമൂഹിക പ്രവർത്തകരും വർഷങ്ങളായി ഇത്തരമൊരു നിയമനിർമ്മാണത്തിനായി സമ്മർദ്ദം ചെലുത്തിവരികയായിരുന്നു.

നിയമത്തിന്റെ കൂടുതൽ വിശദാംശങ്ങൾ വരും ദിവസങ്ങളിൽ സർക്കാർ പുറത്തുവിടും. മതപരിവർത്തനവുമായി ബന്ധപ്പെട്ട കുറ്റകൃത്യങ്ങളിൽ ശിക്ഷാ നടപടികൾ കടുപ്പിക്കുന്നതിലൂടെ ഇത്തരം പ്രവർത്തനങ്ങൾ തടയാനാകുമെന്നാണ് സർക്കാരിന്റെ പ്രതീക്ഷ. എന്നാൽ, ഭരണഘടന ഉറപ്പുനൽകുന്ന മതസ്വാതന്ത്ര്യത്തിന് മേലുള്ള കടന്നുകയറ്റമാണിതെന്ന വിമർശനവും പ്രതിപക്ഷ നിരയിൽ നിന്ന് ഉയരാൻ സാധ്യതയുണ്ട്.