ചോദ്യപേപ്പർ ചോർച്ചയെത്തുടർന്ന് റദ്ദാക്കിയ ദേശീയ മെഡിക്കൽ പ്രവേശന പരീക്ഷ (NEET-UG) ജൂൺ 21-ന് വീണ്ടും നടത്തും. പരീക്ഷയ്ക്കായി വിദ്യാർത്ഥികൾ വീണ്ടും രജിസ്റ്റർ ചെയ്യേണ്ടതില്ലെന്ന് പരീക്ഷാ നടത്തിപ്പുകാരായ നാഷണൽ ടെസ്റ്റിങ് ഏജൻസി (NTA) അറിയിച്ചു. മെയ് മൂന്നിന് 22 ലക്ഷത്തോളം വിദ്യാർത്ഥികൾ എഴുതിയ പരീക്ഷയാണ് വ്യാപകമായ ക്രമക്കേടുകളെത്തുടർന്ന് റദ്ദാക്കേണ്ടി വന്നത്.

വിദ്യാർത്ഥികളുടെ പഴയ രജിസ്‌ട്രേഷൻ വിവരങ്ങളും പരീക്ഷാ കേന്ദ്രങ്ങളും മാറ്റമില്ലാതെ തുടരും. പരീക്ഷയ്ക്കായി അധിക ഫീസ് ഈടാക്കില്ലെന്നും ഔദ്യോഗിക വിവരങ്ങൾക്കായി മാത്രം കാത്തിരിക്കണമെന്നും എൻ.ടി.എ നിർദ്ദേശിച്ചു. ജി.പി.എസ് ട്രാക്കിങ്, 5ജി ജാമറുകൾ, ബയോമെട്രിക് വെരിഫിക്കേഷൻ തുടങ്ങി കർശന സുരക്ഷാ സംവിധാനങ്ങൾക്കിടയിലും ചോദ്യപേപ്പർ ചോർന്നത് വലിയ വിമർശനങ്ങൾക്ക് വഴിതെളിച്ചിട്ടുണ്ട്. 720 മാർക്കിൽ 600 മാർക്കിന്റെ ചോദ്യങ്ങളും ചോർന്നതായാണ് കണ്ടെത്തൽ. ചോദ്യപേപ്പർ 20,000 രൂപ മുതൽ രണ്ട് ലക്ഷം രൂപ വരെ ഈടാക്കിയാണ് വിറ്റഴിച്ചതെന്നും റിപ്പോർട്ടുകൾ സൂചിപ്പിക്കുന്നു.

അതേസമയം, ചോദ്യപേപ്പർ ചോർച്ചയുമായി ബന്ധപ്പെട്ട് രാജസ്ഥാനിൽ യുവമോർച്ച നേതാവ് ദിനേശ് ബിവാളിനെയും സഹോദരൻ മാംഗിലാലിനെയും സി.ബി.ഐ അറസ്റ്റ് ചെയ്തു. ജയ്പൂർ, നാസിക്, ഗുരുഗ്രാം എന്നിവിടങ്ങളിൽ നിന്നായി മറ്റ് മൂന്ന് പേരെയും പിടികൂടിയിട്ടുണ്ട്. പരീക്ഷാ നടത്തിപ്പിലെ സുതാര്യത ഉറപ്പാക്കാൻ വരും ദിവസങ്ങളിൽ കൂടുതൽ നടപടികൾ ഉണ്ടാകുമെന്നാണ് സൂചന.