പഹൽഗാം ഭീകരാക്രമണത്തിന് മറുപടിയായി ഇന്ത്യ നടത്തിയ 'ഓപ്പറേഷൻ സിന്ദൂർ' സൈനിക നടപടിക്കിടെ പാകിസ്താന് ചൈന നേരിട്ട് സാങ്കേതിക സഹായം നൽകിയതായി വെളിപ്പെടുത്തൽ പുറത്തുവന്നു. പാക് സൈനിക താവളങ്ങളിൽ ചൈനീസ് ഉദ്യോഗസ്ഥർ നേരിട്ടെത്തി സഹായങ്ങൾ നൽകിയിരുന്നതായി ചൈനയുടെ ഔദ്യോഗിക ചാനലായ സിസിടിവിക്ക് (CCTV) നൽകിയ അഭിമുഖത്തിൽ ഏവിയേഷൻ ഇൻഡസ്ട്രി കോർപ്പറേഷൻ ഓഫ് ചൈനയിലെ (AVIC) എൻജിനീയർമാർ തന്നെയാണ് സമ്മതിച്ചത്. ഇതാദ്യമായാണ് ഇത്തരം ഒരു സൈനിക ഇടപെടൽ ചൈന പരസ്യമായി സ്ഥിരീകരിക്കുന്നത്.

ഇന്ത്യയുമായുള്ള ഏറ്റുമുട്ടൽ സമയത്ത് ചൈനീസ് നിർമ്മിത ജെ-10സിഇ (J-10CE) യുദ്ധവിമാനങ്ങളാണ് പാകിസ്താൻ പ്രധാനമായും ഉപയോഗിച്ചിരുന്നത്. ഈ വിമാനങ്ങളുടെ പ്രവർത്തനം യുദ്ധമുഖത്ത് കൃത്യമാണെന്ന് ഉറപ്പാക്കാനും ആവശ്യമായ അറ്റകുറ്റപ്പണികൾക്കുമായി ചൈനീസ് എൻജിനീയർമാർ പാക് സൈനികരോടൊപ്പം ചേർന്ന് പ്രവർത്തിച്ചുവെന്ന് എൻജിനീയറായ ഷാങ് ഹെങ് വെളിപ്പെടുത്തി. യുദ്ധവിമാനങ്ങളുടെ ഇരമ്പലുകൾക്കും വ്യോമാക്രമണ മുന്നറിയിപ്പുകൾക്കുമിടയിൽ പാക് സൈനിക താവളങ്ങളിൽ തങ്ങൾ തമ്പടിച്ചിരുന്നതായും അദ്ദേഹം വ്യക്തമാക്കി. വിമാനങ്ങൾക്ക് പുറമെ ഡ്രോണുകളുടെ പ്രവർത്തനത്തിലും ചൈനീസ് വിദഗ്ധർ നേരിട്ട് മേൽനോട്ടം വഹിച്ചിരുന്നു.

ഓപ്പറേഷൻ സിന്ദൂർ സമയത്ത് ഇന്ത്യൻ സൈന്യത്തിന്റെ സുപ്രധാന നീക്കങ്ങളെയും സ്ഥാനങ്ങളെയും കുറിച്ചുള്ള തത്സമയ വിവരങ്ങൾ ചൈന പാകിസ്താന് കൈമാറിയിരുന്നു എന്ന ഗുരുതരമായ ആരോപണവും ഇതോടെ ശക്തമായിരിക്കുകയാണ്. ഇരുരാജ്യങ്ങളും തമ്മിൽ ഡിജിഎംഒ (DGMO) തല ചർച്ചകൾ നടക്കുമ്പോൾ പോലും ഇത്തരം വിവരങ്ങൾ കൈമാറിയിരുന്നതായി ഇന്ത്യൻ സൈന്യം നേരത്തെ വെളിപ്പെടുത്തിയിരുന്നു. പാകിസ്താന്റെ പക്കലുള്ള ആയുധങ്ങളിൽ 81 ശതമാനവും ചൈനീസ് നിർമ്മിതമാണ്. തങ്ങളുടെ ആയുധങ്ങളുടെ യുദ്ധസാഹചര്യങ്ങളിലെ ശേഷി പരിശോധിക്കാനുള്ള ഒരു 'ലൈവ് ലാബ്' ആയാണ് ചൈന പാകിസ്താനെ ഉപയോഗിക്കുന്നതെന്നും റിപ്പോർട്ടുകൾ സൂചിപ്പിക്കുന്നു.

ഏപ്രിൽ 22-ന് ജമ്മു കശ്മീരിലെ പഹൽഗാമിൽ 22 പേരുടെ മരണത്തിനിടയാക്കിയ ഭീകരാക്രമണത്തെ തുടർന്നാണ് ഇന്ത്യ പാകിസ്താനിലെ ഭീകരതാവളങ്ങളെ ലക്ഷ്യമിട്ട് ഓപ്പറേഷൻ സിന്ദൂർ നടപ്പിലാക്കിയത്. ഇതിന് മറുപടിയായി പാകിസ്താൻ ഇന്ത്യൻ സൈനിക കേന്ദ്രങ്ങളെ ലക്ഷ്യം വെച്ചതോടെ ഇന്ത്യ പാക് വ്യോമതാവളങ്ങൾ ആക്രമിച്ച് തകർത്തിരുന്നു. നൂറിലധികം ഭീകരർ കൊല്ലപ്പെട്ട ഈ സൈനിക നടപടിയിൽ ചൈനീസ് സഹായത്തോടെയാണ് പാകിസ്താൻ പ്രതിരോധം തീർത്തതെന്നാണ് ഇപ്പോൾ വ്യക്തമാകുന്നത്. 2015 മുതൽ ഏകദേശം 8.2 ബില്യൺ ഡോളറിന്റെ ആയുധങ്ങളാണ് പാകിസ്താൻ ചൈനയിൽ നിന്ന് വാങ്ങിയിട്ടുള്ളത്.