ദക്ഷിണേന്ത്യയിലെ തിയറ്ററുകളെ ആവേശത്തിലാഴ്ത്തി ദളപതി വിജയ്‌യുടെ ഏറ്റവും പുതിയ ചിത്രമായ 'ജനനായക'ന്റെ ടൈറ്റിൽ കാർഡ് പുറത്തിറങ്ങി. തമിഴക വെട്രി കഴകം (TVK) അധ്യക്ഷൻ കൂടിയായ വിജയ്‌യെ ‘ബഹുമാനപ്പെട്ട തമിഴ്‌നാട് മുഖ്യമന്ത്രി സി. ജോസഫ് വിജയ്’ എന്ന് വിശേഷിപ്പിച്ചുകൊണ്ടാണ് ടൈറ്റിൽ കാർഡ് സ്ക്രീനിൽ പ്രത്യക്ഷപ്പെട്ടത്. ചിത്രത്തിന്റെ ട്രെയിലർ പ്രദർശനത്തിനിടെ ഈ ടൈറ്റിൽ കാർഡ് വന്നതോടെ ആരാധകർ വലിയ ആർപ്പുവിളികളുമായാണ് സ്വീകരിച്ചത്.

2024-ൽ പാർട്ടി രൂപീകരിച്ച വിജയ്, രണ്ടുവർഷത്തിനുശേഷം നടന്ന തമിഴ്‌നാട് നിയമസഭാ തെരഞ്ഞെടുപ്പിൽ വൻ വിജയമാണ് സ്വന്തമാക്കിയത്. 234 അംഗ നിയമസഭയിൽ 108 സീറ്റുകൾ നേടി ടി.വി.കെ ഏറ്റവും വലിയ ഒറ്റകക്ഷിയായി മാറി. ഇന്ത്യയിൽ ഒരു നടന് ലഭിക്കുന്ന ആദ്യത്തെ 'മുഖ്യമന്ത്രി' ടൈറ്റിൽ കാർഡ് എന്ന വിശേഷണത്തോടെയാണ് ഈ ദൃശ്യങ്ങൾ സോഷ്യൽ മീഡിയയിൽ പ്രചരിക്കുന്നത്.

എച്ച്. വിനോദ് സംവിധാനം ചെയ്യുന്ന 'ജനനായകൻ' കെ.വി.എൻ പ്രൊഡക്ഷൻസാണ് നിർമ്മിച്ചിരിക്കുന്നത്. പൂജ ഹെഗ്ഡെ, ബോബി ഡിയോൾ, മമിത ബൈജു തുടങ്ങിയവരും ചിത്രത്തിൽ പ്രധാന വേഷങ്ങളിലെത്തുന്നു. മാർച്ചിൽ പെരുമാറ്റച്ചട്ടം നിലവിൽ വന്നതോടെ, രാഷ്ട്രീയ പരാമർശങ്ങൾ ചൂണ്ടിക്കാട്ടി സെൻസർ ബോർഡ് ചിത്രത്തിന് പ്രദർശനാനുമതി നിഷേധിച്ചിരുന്നു. ഇതിനു പിന്നാലെയാണ് ഇപ്പോൾ ട്രെയിലറിലെ ടൈറ്റിൽ കാർഡ് തരംഗമാകുന്നത്.