ഇന്ത്യയിൽ നിർമ്മിച്ച ആദ്യത്തെ എയർബസ് സി-295 (C-295) സൈനിക ചരക്ക് വിമാനം വിജയകരമായി ആദ്യ പരീക്ഷണ പറക്കൽ പൂർത്തിയാക്കി. ഗുജറാത്തിലെ വഡോദരയിലുള്ള ഫൈനൽ അസംബ്ലി ലൈനിൽ നിന്നാണ് വിമാനം ബുധനാഴ്ച കന്നി പറക്കൽ നടത്തിയത്. രാജ്യത്തെ പ്രതിരോധ-വ്യോമയാന മേഖലയിലെ വലിയൊരു നാഴികക്കല്ലായാണ് ഈ നേട്ടം വിലയിരുത്തപ്പെടുന്നത്. ഇന്ത്യൻ വ്യോമസേനയ്ക്കായി രാജ്യത്ത് നിർമ്മിക്കുന്ന 40 വിമാനങ്ങളിലെ ആദ്യത്തെ വിമാനമാണിത്.

കേന്ദ്ര സർക്കാരിന്റെ 'മേയ്ക്ക് ഇൻ ഇന്ത്യ' പദ്ധതിയുടെ ഭാഗമായി പ്രമുഖ വിമാന നിർമ്മാതാക്കളായ എയർബസും ടാറ്റ അഡ്വാൻസ്ഡ് സിസ്റ്റംസ് ലിമിറ്റഡും സംയുക്തമായാണ് ഈ വിമാനം യാഥാർത്ഥ്യമാക്കിയത്. ഇന്ത്യയിൽ സ്വകാര്യ മേഖലയിൽ നിർമ്മിക്കുന്ന ആദ്യ സൈനിക വിമാനം കൂടിയാണിത്. ഈ വൻകിട കമ്പനികൾക്ക് പുറമെ രാജ്യത്തെ നിരവധി ചെറുകിട-ഇടത്തരം വ്യവസായ സംരംഭങ്ങളും വിമാനത്തിന്റെ വിവിധ ഭാഗങ്ങൾ നിർമ്മിക്കുന്നതിൽ പങ്കാളികളായിട്ടുണ്ട്.

ചരക്ക് നീക്കം, തന്ത്രപ്രധാന നിരീക്ഷണം, ദുരിതാശ്വാസ പ്രവർത്തനങ്ങൾ എന്നിവയ്ക്ക് ഒരേപോലെ ഉപയോഗിക്കാൻ കഴിയുന്ന വിവിധോദ്ദേശ്യ വിമാനമാണിത്. വഡോദരയിലെ ഈ അത്യാധുനിക നിർമ്മാണ ശാല 2024 ഒക്ടോബറിൽ പ്രധാനമന്ത്രി നരേന്ദ്ര മോദിയും സ്‌പെയിൻ പ്രധാനമന്ത്രി പെഡ്രോ സാഞ്ചസും ചേർന്നാണ് ഉദ്ഘാടനം ചെയ്തത്. കന്നി പറക്കൽ വിജയകരമായ പശ്ചാത്തലത്തിൽ, ഈ വർഷം തന്നെ വിമാനം വ്യോമസേനയ്ക്ക് കൈമാറാനാണ് അധികൃതർ ലക്ഷ്യമിടുന്നത്.