ഡൽഹിയിൽ പ്രഖ്യാപിച്ച പ്രതിഷേധത്തിന് മുന്നോടിയായി തീവണ്ടി സർവീസുകൾ റദ്ദാക്കിയ നടപടിയിൽ പ്രധാനമന്ത്രി നരേന്ദ്ര മോദിക്കെതിരെ കടുത്ത പരിഹാസവുമായി കോക്രോച്ച് ജനതാ പാർട്ടി (CJP) നേതാക്കൾ. സി.ജെ.പി സ്ഥാപകൻ അഭിജീത്ത് ദിപ്‌കെ, വക്താവ് സൗരവ് ദാസ്, സഹ കൺവീനർ അശുതോഷ് റങ്ക എന്നിവരാണ് സോഷ്യൽ മീഡിയയിൽ പങ്കുവെച്ച വീഡിയോയിലൂടെ സർക്കാരിന്റെ പബ്ലിക് ട്രാൻസ്പോർട്ട് നിയന്ത്രണങ്ങളെ വിമർശിച്ചത്.

'ഇപ്പോൾ നമ്മുടെ വിശ്വഗുരു 56 ഇഞ്ചിന്റെ മഹാമാനവൻ റെയിൽവേ അടച്ചുപൂട്ടി. കാരണം നാളെ നമ്മൾ പ്രതിഷേധിക്കാൻ പോവുകയാണ്. മോദിജി ഉണ്ടാക്കുന്ന ഈ അന്തരീക്ഷം വളരെ നല്ലതാണ്. മോദിജി, നിങ്ങളുടെ ആരോഗ്യം ഒക്കെ തൃപ്തികരമല്ലേ? കൂടുതൽ ബുദ്ധിമുട്ടുകൾ ഒന്നും ഇല്ലല്ലോ? സർ, കൃത്യസമയത്ത് ബ്ലഡ് പ്രഷർ പരിശോധിച്ചുകൊണ്ടിരിക്കൂ.' -സിജെപി നേതാക്കൾ പറഞ്ഞു.

'റെയിൽവേകൾ അടച്ചുപൂട്ടി. ഏകാധിപതിയായിരുന്ന ഇന്ദിരാഗാന്ധി അടിയന്തരാവസ്ഥയുടെ സമയത്ത് പോലും റെയിൽവേ അടച്ചുപൂട്ടിയിരുന്നില്ല. ഭായ്, നിങ്ങളുടെ വലതുപക്ഷത്തെ ആളുകൾ പറയുന്നത് ജനങ്ങൾ ഡൽഹിയിൽ എത്തുന്നില്ലെന്നാണ്. എന്നാൽ നിങ്ങളുടെ പപ്പ പേടിച്ചിട്ട് അവിടെ എല്ലാം അടച്ചുപൂട്ടിയിരിക്കുന്നു. റെയിൽവേ അടച്ചു, മെട്രോകൾ അടച്ചു... സർ, നിങ്ങളുടെ ബ്ലഡ് പ്രഷർ പരിശോധിച്ചുകൊണ്ടിരിക്കൂ.'

'57 മെട്രോ സ്റ്റേഷനുകൾ അടച്ചുപൂട്ടി ഭായ്. ഗവൺമെന്റ് ഓഫ് ഇന്ത്യ ഡൽഹി ബന്ദ് പ്രഖ്യാപിച്ചിരിക്കുകയാണ്. ഭായ്, എനിക്ക് ഇപ്പോൾ സത്യത്തിൽ സച്ചിൻ ശർമ്മയുടെ (ഡൽഹി പോലീസിലെ ഡെപ്യൂട്ടി കമ്മീഷണർ) മുഖം ഒന്ന് കാണണം. ജനറൽ ഡയർ. സാരമില്ല സർ, എന്തായാലും നാളെ ഞങ്ങൾ വരുന്നുണ്ട്. നാളെ കാണാം, ബൈ ബൈ.' -ഇങ്ങനെ പറഞ്ഞുകൊണ്ടാണ് സിജെപി നേതാക്കൾ വീഡിയോ അവസാനിപ്പിച്ചത്.