പ്രമുഖ പരിസ്ഥിതി പ്രവർത്തകൻ സോനം വാങ്ചുക്കിനെ ഡൽഹി ജന്തർ മന്തറിൽ നിന്ന് പോലീസ് ബലമായി അറസ്റ്റ് ചെയ്ത് മാറ്റിയ നടപടിയെ രൂക്ഷമായി വിമർശിച്ച് ലോക്‌സഭാ പ്രതിപക്ഷ നേതാവ് രാഹുൽ ഗാന്ധി. സമാധാനപരമായി നിരാഹാര സമരം നടത്തുകയായിരുന്ന വാങ്ചുക്കിനെ അറസ്റ്റ് ചെയ്ത നടപടി തികച്ചും തെറ്റാണെന്ന് രാഹുൽ ഗാന്ധി പറഞ്ഞു. സോഷ്യൽ മീഡിയ പ്ലാറ്റ്‌ഫോമായ എക്സിലൂടെയായിരുന്നു (X) അദ്ദേഹത്തിന്റെ പ്രതികരണം.

നീതിക്ക് വേണ്ടി ശബ്ദമുയർത്തുന്നവരെ അടിച്ചമർത്തുന്ന മോദി സർക്കാരിന്റെ കാതലായ തത്വങ്ങൾ അസത്യവും ഹിംസയുമാണെന്ന് രാഹുൽ ഗാന്ധി ചൂണ്ടിക്കാട്ടി. ജനകീയ വിഷയങ്ങൾ ഉന്നയിക്കുന്നതിൽ നിന്നും ജനങ്ങളുടെ അവകാശങ്ങൾക്ക് വേണ്ടി പോരാടുന്നതിൽ നിന്നും പ്രതിപക്ഷത്തെയും ജനങ്ങളെയും പിന്തിരിപ്പിക്കാൻ ഒരു ശക്തിക്കും കഴിയില്ലെന്നും അദ്ദേഹം കൂട്ടിച്ചേർത്തു.

ശനിയാഴ്ച രാവിലെയാണ് ജന്തർ മന്തറിലെ സമരപ്പന്തലിലെത്തിയ ഡൽഹി പോലീസ് സോനം വാങ്ചുക്കിനെ ബലപ്രയോഗത്തിലൂടെ ആശുപത്രിയിലേക്ക് മാറ്റിയത്. തുടർന്ന് സ്ഥലത്തുണ്ടായിരുന്ന സി.ജെ.പി (CJP) പ്രവർത്തകരെയും മാറ്റാൻ പോലീസ് ശ്രമിച്ചതോടെ ജന്തർ മന്തറിൽ വലിയ സംഘർഷാവസ്ഥ ഉടലെടുത്തു. എന്നാൽ, ഡൽഹി ഹൈക്കോടതിയുടെയും ആരോഗ്യ വിദഗ്ധരുടെയും നിർദ്ദേശപ്രകാരം വാങ്ചുക്കിന്റെ ആരോഗ്യസ്ഥിതി കണക്കിലെടുത്താണ് അദ്ദേഹത്തെ ആശുപത്രിയിലേക്ക് മാറ്റിയതെന്നാണ് പോലീസിന്റെ ഔദ്യോഗിക വിശദീകരണം.

ലഡാക്കിന് പ്രത്യേക പദവി ഉൾപ്പെടെ തങ്ങൾ മുന്നോട്ടുവെച്ച ആവശ്യങ്ങൾ കേന്ദ്ര സർക്കാർ പരിഗണിക്കും വരെ നിരാഹാര സമരത്തിൽ നിന്ന് പിന്നോട്ടില്ലെന്ന് സോനം വാങ്ചുക് വ്യക്തമാക്കിയിരുന്നു. ജൂലൈ 20-ന് പാർലമെന്റിലേക്ക് നടത്താൻ നിശ്ചയിച്ചിരിക്കുന്ന മാർച്ചിൽ പങ്കെടുക്കുമെന്നും അദ്ദേഹം അറിയിച്ചിരുന്നു. നേരത്തെ വാങ്ചുക്കിന് അടിയന്തര വൈദ്യസഹായം നൽകണമെന്നും അദ്ദേഹത്തിന്റെ ആരോഗ്യസ്ഥിതി കൃത്യമായി നിരീക്ഷിക്കണമെന്നും ഡൽഹി ഹൈക്കോടതി കേന്ദ്ര-സംസ്ഥാന സർക്കാരുകൾക്ക് നിർദ്ദേശം നൽകിയിരുന്നു.

അതേസമയം, വാങ്ചുക്കിനെ പോലീസ് അറസ്റ്റ് ചെയ്ത് മാറ്റിയതിന് പിന്നാലെ സി.ജെ.പി സ്ഥാപകൻ അഭിജീത് ദീപ്കെ നിരാഹാര സമരം ഏറ്റെടുത്തു. താൻ അനിശ്ചിതകാല നിരാഹാര സമരം ആരംഭിച്ചതായി ദീപ്കെ എക്സിലൂടെ അറിയിച്ചു. തന്നെ ഡൽഹി പോലീസ് തടഞ്ഞുവെച്ചിരിക്കുകയാണെന്നും മർദ്ദിച്ചതായും ദീപ്കെ ആരോപിച്ചിട്ടുണ്ട്.